افرجوا عن مصر يا فجرة

نفس السيناريوبيتكرر ونفس الكلام كتبته في 6 ابريل الماضي يعني من سنة تقريبا وباكتبه تاني دلوقت ومفيش شئ اتغير كتير في الكلام غير اضافة أو حذف لبعض أسماء الشباب المعتقلين اللي كلاب العادلي ومبارك اعتقلوهم لأنهم بيدعوا وبينظموا لإضراب 6 ابريل اللي بيقول كفاية للظلم والديكتاتورية والقهر والفساد وطبعا ده كلام ميعجبش ننوس عين أمه جيمي ولا ابوه الحاكم بأمر الله حبسوا أجمل ما فيكي يا مصر شبابك ورد الجناين اللي هيفتح رغما عنهم اعتقلوا سارة رزق وأمنية طه بنتين بجامعة شرم الشيخ كانوا بيوزعوا بيان 6 ابريل اللي بيدعو للإضراب واعتقلوهم واتردد كلام علي الاعتداء بالضرب عليهم من حرس الجامعة وبعدين سلموهم لكلاب أمن الدولة اللي احتجزوهم فترة في مكان غير معلوم وبعدين سلموهم للنيابة المستقققققققققلة اللي حبستهم اربع ايام علي ذمة التحقيق وبعدها جددوا لهم 15 يوم بتهمة تكدير السلم العام - أي سلم يا ولاااااااااااااد ال ... - لازم نسيطر علي اعصابنا ونكتب بأدب واحترام رغم ان قذارة عصابة مبارك لا يمكن التعامل معاها بأدب أو أخلاق والجميل ان عدد من أصدقاء البنات تضامنوا معاهم فاتضربوا واعتقلوا هما كمان من أمام مجمع محاكم كفر الشيخ ونقل والدة سارة رزق واختها إلي إحدي المستشفيات
من المعتقلين حتى الان
دعاء محمد ,سارة رمضان , محمد عواد ,نور حمدى , سالم عوض , شمس الفخاخرى , احمد النديم ,احمد الغيطى , كريم سليم , محمود رزق , مدحت شاكر , محمد السباعى ومحمد حماسة

زمان كان بيتضحك علينا فى المدارس والجامعات وكانوا بيقولوا لنا إن لكل شئ نهاية ومدى لكن الآب ومبارك والابن جيمى والروح القدس سوزان أكدوا إن النظرية دى مش صحيحة وإن فجرهم وبشاعتهم وديكتاتوريتهم لا محدودة،كل يوم بيتفوقوا على انفسهم وبيبتكروا وبيبتدعوا لدرجة انهم استحقوا وعن جدارة الحصول على لقب أوسخ أسرة مالكة على مستوى العالم، مفيش نظام فى العالم بيرمى المواطنين الغلابة من البلكونات فى عز الضهر غير نظامهم الفاجر ومفيش نظام فى العالم بيستبيح عرض النساء وأعراض الرجال فى أقسام الشرطة غير نظامهم الوسخ ومفيش نظام بيسرق عينى عينك وبيوزع الغنيمة على عينك يا تاجر زيهم

حاجة زبالة ومش بس كدة لأ كل يوم عمالين يكلمونا على الفكر الجديد وجمعية المستقبل وأحلام المستقبل وحتى أخر ابداعاتهم الإجرامية بيبنوا أكبر سجن فى مصر تحت اسم سجن المستقبل وبيصرفوا مليارات على أدوات التعذيب ومرتبات الزبانية والجزارين فى المعتقلات وكل يوم اعتقلوا فلان وعذبوا علان وقتلوا فلتان.

طب يا ولاااااااااااااااااااد ال........... ما تسرقوا من غير قتل الغلابة ما انتم فجرة ومحدش مالى عينكم

نفسى أفهم هما بيسرقوا لمين لعلاء اللى محدش عارف هو فين ولا بيعمل ايه بعد ما كان طايح فى خلق الله وعمال يقاسم ويسمسر وياكل عرق الغلابة وخرب بيوت كتير ومنهم أحمد بهجت ،ولا بيعملوا ده لجمال اللى ربنا يشفيه _اللهم لا شماتة_ ولا لحسنى اللى محدش عارف إذا كان عايش ولا عند ربه

ولا لمين بالظبط الكفن مالوش جيوب حد يفهمهم ده

فين الشيخ حلاوة الملقب بشيخ الأزهر يقولوهم ده ولا هو مش فالح غير يفتى لنا بأحقية اولى الأمر فى الطاعة والولاء وبعد كدة يغرق فى الفتة والهوبر

سيبوا شبابنا متسجنوهاش يا فجرة ،أحلى شباب 6 ابريل والفيس بوك من تيارات سياسية مختلفة اتقبض عليهم ومحدش عارف عنهم حاجة كل تهمتهم انهم بيحبوا البلد دى ولسة عندهم امل يلحقوها

طبعا ده معجبش بهوات الداخلية فقبضوا عليهم بنات وولاد ،أحلى ما فيكى يا مصر بيقتلوه الشباب والحلم والأمل

بس هما أغبيا مش فاهمين ان عمر السجن ما غير فكرة وان عمر القهر ما أخر بكرة