Monday, April 13, 2009

دفاعي عن حزب الله هو في الأصل دفاع عن مصر






ناس كتير زعلت من البوست بتاع السيد نصر الله وبدات اسمع كلام غريب من عينة عبير انتي تشيعتي؟؟؟؟؟؟ وناس قالت لي يا عبير احنا بنحب حزب الله لكن متنسيش ان انا واخويا علي ابن عمي . وناس قالت اني ده مد شيعي للمنطقة العربية وتحديدا مصر . واخرون قالوا ان اللي بيحصل هيرسخ لوجود الدولة الدينية. بس اللي محدش قاله لي لحد دلوقت ليه الحملة دى بدأت دلوقت تحديدا؟ ومن امتي بنصدق السيناريوهات الامنية المفبركة بطريقة مفضوحة . والاهم مين المستفيد من اللي بيحصل دلوقت؟ لو مصر هي المستفيدة فانا مصرية وكنت هأيد فورا اللي بيحصل وابقي داعمة ليه كمان بس محدش بدأ يتابع الاخبار والاحداث اللي بتحصل مع بدو سينا دلوقت من اعتقالات عشوائية للمئات واقتحام المنازل وترويع الاطفال والنساء في ظل تعتيم إعلامي واضح. ومحدش خد باله ان فيه شباب كتير ناشطين سياسيين هيتلموا في هوجة الاعتقالات منهم سامي شهاب اللي بيقولوا انه اتقبض عليه لانتماؤه للخلية الشيعية واتخطف من شهرين ايام صار غزة احمد الكردي اللي مخطوف من ايام حصار غزة واتعرض لتعذيب ومحمد خيرى وأحمد دومة ومسعد ابو فجر ومجدي حسين ومعظم شباب التيارات الاسلامية المختلفة من حزب العمل والإخوان وغيرهم وطبعا في ظل هوجة الهجوم اللي بتشنها الحكومة والإعلام المفروش بتاعها يبقي معاها حق والناس دى هتبقي خونة وعملا لحزب الله وحماس والحوار ده. وكمان مبارك كدة طلع راجل بيفهم وجدع علشان قفل المعبر في وش الفلسطينين الوحشين وأنه لما قال عاوز احمي الامن القومي لمصر كان عنده ق وبلاش يتفتح المعبر تاني وتبقي كدة جت من عند الله والمعبر الوحيد للفلسطينين ومش خاضع للكيان الصهيوني اتقفل وعداه العيب مبارك وقزح!!!!!!!!!!!!!
وكمان كدة اكد للعالم كله ان حزب الله وحماس مش حركات مقاومة لأ دول كخة وبتوع الإرهاب يعني حاجة كدة زى احنا بتوع الاتوبيس:)
والله يا جماعة بركات جمال مبارك بتهل واللعب الوسخ ده لعب مخابرات مصرية وامريكية وسبحان الله كل ده يحصل اثناء زيارة اوباما للمنطقة العربية مش غريبة شوية
والاهم الكل يقولك منتصر الزيات بيأكد ان مفيش تعذيب للمتهمين !!! طب ما فيه محامين تاني كتييييييير في القضية بيقولوا عكس كلامه ليه الإعلام اهتم بس بكلام الزيات وأغفل التانيين إلا إذا كان الهدف هو استكمال سيناريو فاشل ومفضوح لتاكيد التهم المفبركة للضحايا.
وكمان الناس قالوا السيد نصر الله اعترف بكدة .بس أنا شفت كل خطابه اللي قاله ممكن يكون مش عجبني جزء منه لكن الاكيد أنه مش قال ان كان فيه مخطط لعمليات ارهابية في مصر ضد سياح اسرائيليين والأكيد انه وضح بإن الهدف هو دعم الفلسطينين وتهريب السلاح والمؤن ليهم من معبر رفح. كفاية تهريج يا جماعة لأن الايام الجاية هتكون صعبة اوي وجمال ورجالته شغالين صح وفعلا ما شاء الله عليك يا جمال
MADE IN AMERICA

اللي عاوزة اكد عليه إن دفاعي عن حزب الله ليس إلا لإيضاح الحقيقة التي لو ادركناها لاستطعنا نحن حماية الأمن القومي المصري من مبارك وعصابته

1 comment:

حسين said...

و الله كلام صح و عقلاني جدآ. كفاية اوي يا أهل مصر اللي بيحصلنا دة كله و لسة بنتكلم بسطحية و تفاهة و نقول الوحشين بيكرهونا و عايزين يأذوا مصر و الفلسطينين دول كخة و غدارين و هما اللي باعوا أراضيهم كفاية بقى كلام سطحي و تافة أرجوكم. و أية الهوجة دي كلها و فين الهوجة دي لما اتقتل جنودنا على الحدود بأيد الجيش الأسرائيلي و لية مبتحصلتش الهجمة دي على العملاء الأسرائيلين و رجالة الموساد اللي رايحين جايين في سينا و في البلد كلها. أنا هقولكم كلمة واحدة بس سمعتها من خبير عسكري مصري راجل عجوز و محنك غزة هي خط الدفاع الاول عن مصر و طول ما غزة فيها مقاومة مصر بأمان و لو غزة أستسلمت فأعتبروا بوابة مصر الشرقية انهارت فكروا بهدوء و احسبوها هتلاقوها صح