Tuesday, July 31, 2007

على اسم مصر


علي اسم مصر
القصيده لعمنا صلاح جاهين
على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
نهايته يا مصر اللي كانت أصبحت وخلاص
تمثال بديع وانفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة ف أبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال ابن خلدون أمم متفسخة تعيش ليش
وحصان صهل صحى جميع الجيش
على اسم مصر
النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
أسمعها مهموسة والا أسمعها مشخوطة
شبكة رادار قلبي جوه ضلوعي مضبوطة
على اسم مصر
وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أو حيحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد أقوله لحد
القمح ليه اسمه قمح اليوم وأمس وغد
ومصر يحرم عليها .. والجدال يشتد
على اسم مصر

Thursday, July 12, 2007

مين وائل عباس؟


وائل عباس المفترى عليه وهو أكبر من أي إفتراء
هو شاب من أجدع شباب مصراتبهدل كتيييييييييير واتظلم أكتر وأكتر لكن عمره ما اتخلى عن مبادئه ولا باع قضيته وكان دايما أكبر من أى لحظة انكسارشخصية أمام قضايا الوطن

وائل عباس عمره 33 سنة ولسة لا استقر فى شغل ولا كون أسرة ولا عنده رصيد فى البنك يا دوب حتة العربية القديمة اللى على طول عند الميكانيكي بتتصلح واللاب توب القديم بتاعه والحاجات دى اشتراها لما كان شغال فى وكالة الأنباء الألمانية قبل ما يطرد منها بأوامر أمنية بعد تبنيه نشر فيديوهات التعذيب اللي فضحت ابطالها من كلاب الداخلية و القريبين من وائل عاشوا معاه ا أزمة انكساره وحزنه فى الفترة دي ومنهم أنا وخالد البلشى وحسام الحملاوى ودماغ ماك وكتير من أصحابنا والغريب ان فى نفس الوقت ده كان فيه هجوم عنيف علي وائل واتهامه بإتهامات حقيرة من عينة انه عميل للأمن مرة يبقي أمن دولة ومرة تانية ربنا يكرمه ويبقي أمن قومى وبعد كدة خرج مجموعة تانية من الأشاوس يتهموه خير اللهم اجعله خير بالعمالة للمخابرات الأمريكية والدول الغربية التى تستهدف تشويه سمعة مصر المحروسة يعني لما كلاب الداخلية تعذب البشر فى الاقسام وتهتك أعراضهم وتلفق لهم تهم عمال على بطال ده عادى لكن لما وائل عباس والمدونين ينشروا يبقوا ولاد كلب بيشوهوا سمعة مصرويطلع لهم رئيس تحرير جريدة يومية شعارها "احنا لاجريدة قومية ولا معارضة احنا أمن" يقولك خدوا تمن عمالتهم للخارج جوايز والفيديوهات دي ملفقة ويقعد يهطل زى ما بيهطل ويشتم شوية في جورناله اللي ما بيتوزعش غير فى لاظوغلي وجابر بن حيان
والظريف دلوقت كمان اتهام وائل عباس بالعمالة لإسرائيل والشذوذ والقذورات اللى بيتكلم فيها اصحاب النفوس الضعيفة اللى معملوش نص اللي عمله وائل وعمالين بس يهبلوا علي الفاضي ويعبطوا بكلام سخيف ملوش أى أساس من الصحة
وائل عباس صديقي الجميل الطيب النقى الأصدق والأكبر مقاما من كل المدعين اللى بيشتموه وبيتهموه واللى فشلوا فى كل شئ حتى فى مهمتهم المقدسة لتشويه صورته

الف مبروك يا وائل الجايزة والله يا صاحبي انت اكبر من أى جايزة مهما كانت وعاوزة أقولك إن انت حواليك ناس كتير بتحبك وبتحترمك وكفاية اقولك إن خبر فوزك بالجايزة انا عرفته هنا من شاب عربى كندى بيحبك جدا وبيحترمك وبيعتبر مدونتك من أهم المدونات المصرية وفى رأيه الشخصي انها الأهم فعلا


فيفا فيفا وائل عباس

نقلا عن الوعى المصرى
وائل عباس يفوز بجائزة نايت الدولية للصحافة

Wael Abbas wins the 2007 Knight International Award for Civic journalism

صباح اليوم كنت أتفقد إيميلي كالعادة لأجد رسالة من المركز الدولي للصحفيين يخبرني فيه بفوزي بجائزة نايت الدولية للصحافةوجائزة نايت الدولية للصحافة هي من أهم جوائز الصحافة في العالم وهي اول من يعترف بمجهودات صحافة المواطن
وقد جاء في حيثيات الفوز ما يلي أن الجائزة مقدمة تقديرا لتفانيك في مجال الصحافة في مواجهة تحديات هائلة وإعترافا بمجهوداتك لتطوير إعلام مستقل عالي الجودة في مصر
وهذه مقتطفات من الرسالة التي تلقيتها

Dear Wael AbbasThe International Center for Journalists, a non-profit group that administers the Knight International Journalism Fellowships, congratulates you on receiving the 2007 Knight International Award for Civic journalismThe Award is a testament to your devotion to the craft of journalism in the face of overwhelming challenges and recognizes your efforts to promote high-quality, independent media in Egypt

جدير بالذكر أن هذه الجائزة حصل عليها عدد من أهم الصحفيين الأمريكيين ومن مختلف دول العالم مثل
توم بروكو من شبكة إن بي سي والذي قام بتغطية تفجيرات أوكلاهوما وسقوط حائط برلين وحرب فيتنام وكان أول من حاور ميخائيل جورباتشوف وبوب شيفر من شبكة سي بي إس ومقدم البرنامج الشهير فيس ذا نيشان وهو الذي أدار المناظرة بين بوش وكيري وشذا الجابوري مراسلة البي بي سي في العراق وخوسيه أنطونيو بيلا مصور أسوشيتدبرس
جريدة الوعي المصري الإلكترونية


Friday, July 6, 2007

نقلا عن مدونة مراقب مصري


الجمعة, 06يوليو, 2007
الشرطة تعتدي على صحفي بجريدة الدستور

كان زميلنا أحمد بدر الصحفي بجريدة الدستور المصرية في طريقه إلى منزله فذهب ليستقل ميكروباص من موقف شبين القناطر (محطة كلية الزراعة) والموقف يقع خلف قصر محمد علي. وشاء حظ أحمد العاثر أن يمر بهذا المكان وقت أن كان السفير الأمريكي يزور القصر وسط إجراءات أمنية مشددة وتواجد أمني مكثف.
يقول أحمد: "فوجئت بقوات الأمن تحاصر كل المنطقة بشكل غريب. وبينما كنت أسير اعترضني أمين شرطة بأمن الدولة (بحسب ما علمت من أحد المصادر بنقطة كلية الزراعة) وأخذ يدفعني بعنف بعيدا فقلت له: "إيه اللي بتعمله دا... بتزق ف إيه... أنا صحفي!"
أجابني الأمين: "صحفي ولا مش صحفي يا ابن المتـ ... ـة... الصحافة على جزمتنا"... وختم سبابه بصفعة بالقلم على وجهي!!
"لقيت سبعة أمناء شرطة بيجرجروني على أحد الضباط بنقطة شرطة كلية الزراعة... طلبت من الضابط يعمل محضر بالواقعة فرفض الضابط... كان هناك ثلاثة ضباط منهم إثنان من أمن الدولة على الأرجح لأنهما كانا يرتديان ملابس مدنية والثالث هو الملازم أول إسلام خليل الضابط بقسم أول شبرا الخيمة. الملازم أول إسلام خليل (لابس ميري) منعني من عمل محضر وأنا أصريت على تحرير محضر رسمي بالواقعة."
"دخلت إلى مأمور قسم شرطة أول شبرا الخيمة لأطلب منه أن أحرر كل ما حدث في محضر رسمي... المأمور قال لي: اكتب في المحضر كل حاجة، وإن كان حذرني مهددا أن أمن الدولة ممكن يلفق لي قضية ويدعوا إنك ضربت أمين الشرطة أو يلبسوك أي قضية"
"خلاص يعملوا اللي هما عايزينه وبرضو هعمل محضر"
حرر أحمد بالفعل محضرا بالواقعة (محضر إداري رقم 5830 / 2007 قسم أول شبرا الخيمة) وذكر في المحضر الاعتداءات وسوء المعاملة التي وقعت عليه من قبل قوة الشرطة التي كانت موجودة في المكان كجزء من حراسة السيد السفير الأمريكي الذي كان قريبا من قصر محمد علي. قال لي أحمد بدر في اتصال هاتفي أن "الشارع كله كان متغطي عساكر وأمناء شرطة وضباط من أمن الدولة والشرطة"، وأنه فوجئ بسبعة أمناء شرطة من حوله يدفعونه وأحدهم صفعه على وجهه. وأخذوه إلى ثلاثة من الضباط بينهم ضابط أمن دولة والضابط إسلام خليل وضابط آخر يرتدي ملابس مدنية.
أحمد بكل أسف ما يعرفش مين هما أمناء الشرطة اللي ضربوه وأهانوه... وعيون الأمن الساهرة في قسم أول شبرا الخيمة يتسترون على أمناء الشرطة المعتدين. وعلم المراقب المصري أن بعضا من زملاء أحمد يفكرون في تنظيم اعتصام أمام قسم شرطة أول شبرا الخيمة للمطالبة بالكشف عن هوية الأمناء الذين اعتدوا على الصحفي أحمد بدر.
غريبة ومراقب مصري يدعوا الجميع للتضامن مع الزميل أحمد بدر الصحفي بالدستور سواء بنشر خبر الاعتداء عليه في مدوناتنا أو على المنتديات والمجموعات البريدية