Saturday, January 26, 2008

إنك لميت وإنهم لميتون

إنك لميت وإنهم لميتون








اليوم سوهارتو وغدا مبارك

ده كان ده شعار رددناه واحنا طلبة فى مظاهرات الجامعة فى مارس 98 لما قامت إحتجاجات شعبية
أسقطت الديكتاتور الإندونيسى سوهارتو واللى حكم اندونيسيا بقبضة حديدية لمدة 32 عام انتهك فيها
حقوق الإنسان وقمع المواطنين واعتقل السياسيين واستطاع بمجهوداته العظيمة فى القمع والقهر
والتعذيب الدخول فى منافسة حامية مع قرينه الديكتاتور المصرى مبارك وبدأ الاتنين فى التنافس على
المرتبة الاعلى فى قوائم أسوأ ديكتاتور فى العالم بس مع الأسف عدت السنين سوهارتو طار ومبارك زى ما هو قاعد
ومربع على قلوبنا مش عارفة هو عاوز يفضل كدة لمدة 32 سنة هو كمان ولا إيه ؟ عندى أمل بتدخل
إلهى سريع إن شاء الله

النهاردة قريت خبر وفاة سوهارتو بعد ما عانى من كل أمراض الدنيا القلب والرئتين والكلى وقلت طب ما ريسنا
أمراضه كتييييييير برضوا الله يريحه من كل أمراضه آميييييييييييييين

بس مش عارفة ليه عملت مقارنة سريعة بين الاتنين

الأول ديكتاتور وصاحبنا شرحه حاصل على مرتبات عالية جدا فى الحدوتة دى

الأول حكم بقبضة من حديد والتانى الحديد نفسه

الأول عذب وقمع وقهر واستبد التانى تاريخ حافل من القمع والقهر والفساد

الأول حكم 32 سنة ولمدة سبع فترات متواصلة طب ما التانى حكم أكتر من 25 سنة ورا بعض بلا منازع

الأول حول بلاده من فقر إلى رخاء نسبى بس ده ما خلاش الناس تغفر له والتانى دخل على مصر برجله
الشمال فخلاها أرض جدباء لازرع فيها ولا ماء

الأول مريض بأمراض الشيخوخة طب ما هو السبعينات زى التمانينات كلها شيخوخة


الأول الثورة الشعبية طيرته من على الكرسى والتانى قاعد على قلوبنا

الأول مات النهاردة طب ما التانى ان شاء الله هيحصله قريب جدااااااا

وصدق الله العظيم عندما قال

إنك لميت وإنهم لميتون

22 comments:

Anonymous said...

كل انسان مسئول عن عمله سواء أكان رئيسا او غفيرا..
وكلكم راع وكل راع مسئول عن رعيته..
و أذكر القصة القديمه عن الفاروق سيدنا عمربن الخطاب عندما وجدوه يبكى يوما وسالوه عن سبب بكائه فقال ما معناه: اخشى أن تقع دابه على الأرض فى العراق فيسأل عنها عمر..
و ذلك يعنى انه كان يقدر حجم المسئوليه التى تقع على كاهله..
و أقول لنفسى ولكل حاكم ولكل راعى :أتقى الله..سوف يأتى يوما..يفر المرء من بنيه وزوجته واخيه..
حاسب نفسك قبل ان تحاسب..فكلنا ميتين.
علاء الغندور

Anonymous said...

أنا بقي شايف يا عبير اننا شعب وصل لدرجة من الخيبة و التبلد انه مش عارف يغير حاجة بايده فقرر يعتمد علي الارادة الاهية لتنقذه من هذا الديكتاتور
و دة الفرق بين سوهارتو و مبارك فرق بين الشعوب
عمرو عوف

Anonymous said...

على فكره مبارك كمان حاجه وتمانين كده تمانين خيبه انا مش عارف هو فاكر نفسه كام سنه لما يقابل ربنا حايقله ايه ده خلاص كلها كام يوم ويموت هو فاكر نفسه لسه عيل صغير
امتى مبارك يتوب

Anonymous said...

عبير
جميل رجوعك للتدوين بكل هذا النشاط انا بجد سعيد جدا بنشاطك بس خايف لاحسن رجالة سوهارتو بتاعنا يكلموا رجالة بلوجر ويقفلولك المدونه زى ما قفلوا مدونتى وانتى عارفه سوهارتو ورجالته قمعجيه وما بيرحموش اكتبى اكتر يا عبير لما بنقرا اللى بتكتبيه بنحس بانك لسه معانا فى مصر

Anonymous said...

صحيح انك لميت وانهم لميتون
بس فيه فرق كمان انتى نسيتيه يا عبير ان سوهارتو اندونيسيا مالوش اولاد فى السلطة أما سوهارتو مصر فالخوف بعده من انه ييجى يوم يحكمنا سوهارتو السابع عشر ويبقى يومها مصر اسمها المملكة السوهارتية

Anonymous said...

سوهارتو اندونيسيا سقط من الحكم ثم ذهب الي مزبلة التاريخ برحيله ، اما سوهارتو مصر فمازال في الحكم ، فهل سنعيش اليوم الذي نسقطه من الحكم ثم نشيعه الي مزبلة التاريخ مع كل رفاقه في الاستبداد والفساد ؟؟؟؟
ان غذا لناظره لقريب

Anonymous said...

بجد بجد نفسنا نرتااااااااح منه بقى
تعبنااااااااااا
تحياتى

Anonymous said...

تحياتى لقلمك الجميل
بس مبارك مش في السبعينات ولا حاجة
ماهو خلصها
فى مايو الجاى هايكمل 80 سنة
يعنى كمان حوالى 3 شهور
يعنى بيلعب فى الوقت بدل الضايع
وياريته عارف يجيب اجوان انما بيدينا احنا فى سنانا وعلى راسنا
وحتما بيدخل فينا اجوااااااااااان
تحياتى
ماجد ابراهيم

mohamed el-kholy said...

بكرة قريب ياستى ومتقلقيش فلت الكتير ومابقى غير الفرح فى موت الكبير

هو مش فعلا مصر عروسه وبكرة عريسه

طب خلاص اهو بكرة جي بخبر فى كل الصحف القومية والمستقلة والمعارضة عن رحيل اكبر ديكتتاتور معمر

تحياتى
محمد الخولى

Anonymous said...

جميل هذا البوح .... اكيد حيغور زي اي زبال تاني

Viper said...
This comment has been removed by a blog administrator.
غريبة said...

Viper said...
لا أعتقد أن عمر ميارك سيعطيه الفرصة للترشح في الانتخابات الرئاسية القادمة.. أنا شايف انه عمره هيكون أقصر من كده..

الراجل مريض يا جماعة.. يا ريت نجهز للفترة اللي جاية
استاذى الفاضل ده تعليقك زى ما هو ما خذفتش منه غير بس اعلانك عن مدونة بتشتم فى وائل عباس وبتشوه صورته وبتتهمه باتهامات بشعة من عينة العمالة لامريكا واسرائيل وامن الدولة والمخابرات وادارة المرور وحاجات كدة غريبة مش مفهومة يعنى ايه تتعمل مدونة تشتم فى شخص عادى ما تروح تعمل مدونة عن جرايم مبارك واشتمه للصبح واحنا معاك أو تعملها عن ضباط التعذيب وسلخانات الداخلية ولا عن اهل القرصاية واللى بيحصل لهم ولا قلعة الكبش واللى جرى لسكانها ولا عن الفقر والعشوائيات ولا عن اضراب العمال وفصلهم وحربهم من اجل الحصول على حقوقهم ولا اعتقال الطلبة واهانة القضاة ولاحبس الصحفيين وقمع حرية التعبير فى مصر ولا ولا ولا حاجات كتييييييييير ممكن يتعملها مواقع مش مجرد مدونات انا اختلفت تماما مع اللى كاتبه وائل عباسعن غزة بس ما روحتش عملت تدوينة شتمته لأ عملت تدوينة عن غزة والحصار وقذارة الحكام العرب ولعلمك أنا منتمية لأكتر فصيل وائل يحمله عداء وبيهاجمه ومع ذلك احنا اصحاب
يا ريت نعمل زى ما قلت قى تعليقك نبتدى نشوف نعمل ايه للمرحلة الجاية وفى رأيي الشخصى إن أهم خطوة نعملها هى اننا نتعلم إاى نختلف مع بعض بدوت اتهامات وتخوين وازاى نتعلم قبول الآخر حتى لو اختلفنا معاه وفى الاخر يا صديقى يا ريت مساحة المدونة اللى انتوا عاملينها لشتيمة شخص نستفيد بيها فى فضح ممارسات نظام فاسد
مش كدة افضل بذمتك
عموما نورت يا فندم واتمنى زيارتك تتكرر بس علشان نفكر مع بعض ونتعلم من بعض ونصحح لبعض
ويا ريت كمان ما تروحش تشتمنى عندك وتتهمنى بالعمالة لوائل عباس وتقول ان تعليقك فى مدونتى كان بالونة اختبار ولائى لمصر ولا لوائل العميل الامريكى الصهيونى الامنى البدنجانى
:)..

Viper said...
This comment has been removed by a blog administrator.
غريبة said...

ادينى نشرت عنوان المدونة اللى انت عاوز تعلن عنها يا فايبر يا ترى دى هو معنى الديمقراطية اللى انت تعرفه انك تشتم وتسب الآخرين هى دى الديمقراطية يبقى انا ديكتاتورية جدا
الاول كنت معتقدة انك ممكن تكون عندك مشكلة مع وائل بس لكن واضخ ان انت عندك مشكلة مع كل شخص يخالفك فى الرأى وواضح كمان انك اتعلمت بس تتهم وتهاجم وتخون مش تتناقش وتفكر
ادى عنوان مدونتك اللى حذفته وانت اعتبرت دى ديكتاتورية وقولت اللى قلته نشرته مخصوص علشان اثبت لك انك غلطان ومتسرع ومعندكش فكرة اصلا عن حاجة اسمها ديمقراطيةوالخلاف مع الآخر واستيعاب آراء الاخرين
ويا ريت متشرفنيش تانى بالزيارة

Viper said...
This comment has been removed by a blog administrator.
غريبة said...

يا بنى دى اخر مرة هارد عليك فيها لأنى معنديش استعداد ارد على الكلام الفاضى ده انت بتعرف تقرا ولا ايه؟ انا كلامى واضح جدا باقولك انا لا باحب حد يشتم عندى ولا باعلن عن مدونات كلها بذاءاءت وشتايم بالام والاب وبعدين انا ما بنشرش تطاول على حد ومليش علاقة انك بتنتقد وائل عباس ولا غيره انا كلامى واضح لو مدونتكم ضد أى حد تانى برضوا ده هيكون موقفى وكلامىوبعدين ايه صيغة الجمع اللى بتتكلم بيها دى احنا احنا وعمال تقولى موضوعية انتوا مش عارفين معناها ارد عليك بأدب تقول عبير العسكرى من نفس عجينة وائل والنبى دى موضوعية ولا تطاول وقلة أدب باقولك ايه كفاية كدة علشان مش فاضية عندى حاجات أهم باعملها عندى دراسة وشغل ماشى

Anonymous said...
This comment has been removed by a blog administrator.
غريبة said...

مضطرة اسفة انى ارد عليك لان مفيش وسيلة اتصال تانية. ابتزاز ايه يا بنى اللى انا رضخت له انا باوريك بس ان كلامك الفاضى ده لا يؤثر فى وائل عباس ولا فى عبير العسكرى ولا أى حد من أصحابنا المحترمين ده كلام عبيط وما يهزش شعرة فى حد فينا ومفيش اسهل من ضغطة منى دلوقت امسحك من عندى خالص لكن انا قولت ماشى أهو وكلامك ده بجد بيضحك ويبكى فى نفس الوقت بيضحك لانك بتستخدم كلام كبير اوى زى ابتزاز وديمقراطية ومعتقد نفسك الواد الفت الذكى اللى مفيش منه اللى بشوية خبث وذكاء خلانى نشرت له تعليقه وضرب عصفورين بحجر واحد عمل اعلان عن مدونته اللى كل اللى بيدخلها مجاهيل وصاحبها نفسه مجهول وبالمرة خبط فى عبير العسكرى وطبعا ده تصور أهبل وبجد والله كلامك يبكى لأنك صعبان على اوى بتضيع وقتك على الفاضى وقاعد مش وراك حاجة غير شتيمة الناس وعمال تتصور انك اذكى انسان فى العالم وممكن تكون العكس تماما
وبعدين موضوع انك ممكن تكون صاحب وائل ولا حد نعرفه فدى لا تفرق معايا ولا مع وائل عباس ولا حتى مع اصحابنا فى شئ لأن مفيش أسهل من الخيانة والنفاق والخديعة والضرب فى الضهر وتحت الحزام
بجد انت صعبان على لان نفس الاتهامات اللى بتتهم بيها غيرك اتقالت عليك وعلى مدونتك يا بنى اتعلم ازاى تتحاور بدل ما تشتم وازاى تكون انسان ايجابى بدل ما تبقى حد فاضى مورهوش حاجة غير التطاول على غيره اللى هما فعلا افضل منه بأعمالهم
ويا ريت متبعتليش تانى وعاوز تشتمنا اشتمنا فى حتى تانية غير هنا اقرى لتعليقات اللى فاتت هتلاقيها كلها لناس بتتناقش بأدب وبتتحاور مع بعض وبترد على بعض
وبعدين هو البوست ده عن وائل عباس ومدونتكم المصونة ولا عن موضوع أهم وهو ديكتاتور مصر الاكبر وعموما انا رديت عليك كتير وعلشان كدة ولا تزعل انا هامسحها

غريبة said...

واضح ان الناس اللى عاوزة تصفى حساباتها وتفرغ حقدها وغلها تجاه وائل وغير عاوزين يديروا الحوار من عندى لذلك باعتذر عن الاشتراك معكم فى هذه المسرحية الهزلية عديمة القيمة ومضطرة اسفة بناء على رغبات الأصدقاء حذف التعليقات المخالفة للفكرة الرئيسية لتدوينة إنك لميت وإنهم لميتون
واللى عاوز يشتم حد يروح يشتمه فى مدونته يا رجالة وطبعا هينوبنى من الحب جانب بس عادى مش مهم
:)

غريبة said...

بالنسبة للشخص الجميل اللى بيقول انه ممكن يكون صاحب وائل وبيضحك فى وشه لما بيشوفه فأنا مستعدة أننشر لك اللى انت عاوزه لأنى بجد مش ضامنة تكون انت مش من اللى عاوزين يديروا حوار تانى فيه حقد وغل وغيرة هنا عندى
انا اسفة اضطريت امسح تعليقك
ودى اول مرة امسح فيها تعليقات لحد
باعتذر عن ذلك للجميع لكن من حقى انا احافظ على مدونتى وكمان انفذ طلب اصدقاء أعزاء لى بذلك

يساري مصري said...

رد حسني عليكي و قال ..

" انكم لميتون و انا على الكرسي "
مين دا اللي يموت يا ماما

انا خلاص آمن انه إله من آلهة الفراعنه من زمان و ريحت دماغي عشان متفقعش

Anonymous said...

عبير مدونتك رائعه جدا وأتمني لك أن تعودي إلي وطنك مع أني أعلم أنك فقدت الغربه عندما تركتي دولة يحكمها ديكتاتور