شهاده صحفي في ميدان التحرير

شهادة الصحفى الحسينى أبو ضيف عما حدث فى ميدان التحرير منذ قليل

اللواء محمد زكى قائدسلاح المظلات قاد لوائين مظلات 182 و 170

بالاشتراك مع العقيد عماد رمضان قائد وحدة 777 اللى جات بكامل قوتها من الهايكستب امام جيرولاند

و كان معاهم اللواء ابراهيم نائب مدير الشرطة العسكرية جه معاه 16 مدرعة فهد عليها رشاشات المتعددة بكامل قوتها

لوائين امن مركزى ابتدوا يحتشدوا عند المتحف بداية من الساعة 1 صباحا

الساعة 3 بدأ هجوم قوات المظلات على ميدان التحرير دخلوا من ناحية القصر العينى على هيئة صفوف الضباط كان معاهم سلاح الى و ضربوا رصاص فى الهوا

و وراهم اربع مدرعات شرطة عسكرية و بدأوا يضربوا الرصاص الفشنك فى الناس اللى وقفوا امام صفوف المظلات فى اليداية

بعدهم وحدة 777 بكامل قوتها بقيادة عماد رمضان و عقيد اسمه محمد نظموا صفوفهم امام هارديز و كانت تعليماتهم انهم هيدخلوا يجيبوا الظباط اللى جوا الخيمة اللى خانوا المشير

دخلوا اقتحموا ناحية الصينية فى نفس الوقت اللى كانت المظلات بتتحرك صفوف ناحية المتظاهرين فى طلعت حرب و دخل بعدها 12 عربة مدرعة فهد من الشرطة العسكرية ضربت نار بكثافة شديدة و حاصرت الصينية و بدأت 777 تقتحم الصينية و كانت تحمل سلاح هكلر المانى و هما بيتقدموا كانوا بيضربوا رصاص فى الهوا لحد ما وصلوا لخيمة الضباط

و كان فى عناصر قبل الهجوم من المخابرات العسكرية اعلنوا انهم مع الاعتصام بس الضباط لازم يلبسوا مدنى

ظهر دورهم لما ال 777 وصلت للخيمة لما ابتدوا يضربوا المتظاهرين اللى محاوطين الخيمة

ضباط الجيش اللى كانوا فى الخيمة رفضوا يهربوا و قالوا هنموت هنا لكن الناس تمسكت بيهم و ال 777 قبضت على 2 منهم و الباقى الناس قدروا يحموهم

اول تلات مدرعات شرطة عسكرية دخلوا بسرعة للميدان من ناحية عمر مكرم بيلفوا حوالين الصينية ناحية كنتاكى بسرعة جنونية عشان تدوس الناس

الصاعقة اخدوا الضباط الاتنين اللى اتقبض عليهم ناحية المجمع فى الوقت اللى الضابطين دول كانوا رافعين راسهم و جه ظابط كبير عايز يضرب واحد منهم بالقلم و بعد ما ضربه بتوع الصاعقة منعوه انه يكرر الضرب

الضباط التانيين مكانوش عايزين يسيبوا زمايلهم لكن الناس جرتهم ناحية طلعت حرب

فى الوقت ده كان فى ناس لابسين مدنى تبع المخابرات العسكرية و امن الدولة كانو موجودين فى الصينية بيوجهوا القوات

فى الوقت ده المظلات فتحت مدخل الميدان من ناحية عبد المنعم رياض للامن المركزى عشان يتعامل مع المتظاهرين اللى فى مدخل طلعت حرب و بدأ الامن المركزى يضرب المتظاهرين اللى فى مدخل طلعت حرب بالرصاص المطاطى و بدا الثوار يضربوا طوب و الامن المركزى هرب ناحية الصينية و معاهم المظلات و بتوع الصاعقة

بعدها دخلت المدرعات من ناحية الصينية ناحية طلعت حرب عشان تفرق الثوار و هيا بتضرب طلقات حية فى الهوا بكثافة شديدة و ظهر ان الضرب حي من اثر ضوء الرصاص فى الهوا

و وراهم الصاعقة و المظلات و الامن المركزى العساكر كانوا بيضربوا طوب و الظباط كانوا بيضربوا بالرصاص الحى فى الهوا مع المدرعات

بدأت بعدها كل القوات اللى فى الميدان تضرب رصاص فى الهوا مع القوات اللى داخلة على طلعت حرب بكثافة شديدة

تراجع الثوار ناحية ميدان طلعت حرب بعدها توقف ضرب الرصاص

بعدها قوات الجيش صاعقة و مظلات ابتدت تلم الفوارغ عشان ميسيبوش اثر

فى الوقت ده كان فى ناس بتصور من العماير المطلة على الميدان ابتدى الجيش يضرب عليهم رصاص حى و شوفت بعينى مقدم مظلات بيضرب رصاص ناحية العمارات دى

و حصلت اشتباكات كتير فى طلعت حرب و فضل ضرب النار شغال لغاية ما مشيت الساعة 5 ونص

ناس كتير لجأت لمسجد عمر مكرم و كنت منهم و جات ورانا قوة مظلات و حاصرتنا و الفجر اذن و رحت ناحية الجامع عشان اصلى فلقيت الناس بتقول لملازم اول مظلات من اللواء 182 مظلات لابس قناع اسود حرام تقتل اخوك فرد عليهم انا بطيع القائد بتاعى زى ما بيطع الرسول و لو عصيته زى ما اكون بعصى ربنا

و دخلت المسجد و ليقت شباب و ست منقبة بتصرخ لان ابنها مفقود و مش عارفة تتصرف و كان فى ستات كتير و عدد الناس حوالى 300 و كان فى اتنين مصابين فى المسجد فى رجليهم  .. صلينا الفجر و خرجت تانى و سمعت صوت ضرب رصاص شديد فى طلعت حرب

فى اللحظة دى كان فى معانا دكتور راح عشان يسعف واحد اتضرب بالرصاص فى الميدان و لما رجع عرفنا انه استشهد فالناس قعدت تهتف " المحاكمة المحاكمة لعصابة مبارك اللى لسا حاكمة" " يسقط يسقط المشير"

و بعدها لقيت القوات الموجودة فى التحرير بالكامل بتضرب رصاص فى الهوا بكثافة شديدة

فى الوقت ده كان فى تشكيلين امن مركزى جايين ناحية عمر مكرم فالناس قعدت تهتف " الكلاب اهم " و كان معاهم مدرعة شرطة عسكرية فهد

ظباط المظلات بلغوا الناس ان حظر التجول لغاية الساعة 10 بحجة ان فى اتنين ظباط كبار اتضربوا النهاردة فى التحرير لما كانوا رايحين يجيبوا الظباط اللى مع الثورة و ده محصلش لان اللى كانوا موجودين هما اللواء حمدى بدين قائد الشرطة العسكرية و حاول ياخد الظباط لكن الناس هتفت "بره بره" و طلع من غير ما حد يكلمه

و فضلت مدرعات الشرطة العسكرية موجودة فى ميدان التحرير و الاشتباكات لسا مستمرة فى طلعت حرب لحد ما مشيت

ملحوظة انا شوفت صف ظابط كان معايا ايام خدمتى فى الجيش فى الصاعقة من 6 سنين و قولتله انا كان نفسى لما اشوفك اسلم عليك و احضنك عشان كنت بحبك لكن دلوقتى لأ .. رد عليا و قالى إنت غلطان عشان انت معاهم

شهادة الصحفى الحسينى أبو ضيف عما حدث فى ميدان التحرير منذ قليل

فجر يوم السبت 9 أبريل

6:00 am