Wednesday, July 23, 2008

افرجوا عن مصر يا فجرة

ده كان شعار الشباب فى 6 ابريل ودى رسالتهم للنظام الفاجر العاهر


زمان كان بيتضحك علينا فى المدارس والجامعات وكانوا بيقولوا لنا إن لكل شئ نهاية ومدى لكن الآب ومبارك والابن جيمى والروح القدس سوزان أكدوا إن النظرية دى مش صحيحة وإن فجرهم وبشاعتهم وديكتاتوريتهم لا محدودة،كل يوم بيتفوقوا على انفسهم وبيبتكروا وبيبتدعوا لدرجة انهم استحقوا وعن جدارة الحصول على لقب أوسخ أسرة مالكة على مستوى العالم، مفيش نظام فى العالم بيرمى المواطنين الغلابة من البلكونات فى عز الضهر غير نظامهم الفاجر ومفيش نظام فى العالم بيستبيح عرض النساء وأعراض الرجال فى أقسام الشرطة غير نظامهم الوسخ ومفيش نظام بيسرق عينى عينك وبيوزع الغنيمة على عينك يا تاجر زيهم

حاجة زبالة ومش بس كدة لأ كل يوم عمالين يكلمونا على الفكر الجديد وجمعية المستقبل وأحلام المستقبل وحتى أخر ابداعاتهم الإجرامية بيبنوا أكبر سجن فى مصر تحت اسم سجن المستقبل وبيصرفوا مليارات على أدوات التعذيب ومرتبات الزبانية والجزارين فى المعتقلات وكل يوم اعتقلوا فلان وعذبوا علان وقتلوا فلتان.
طب يا ولاااااااااااااااااااد ال........... ما تسرقوا من غير قتل الغلابة ما انتم فجرة ومحدش مالى عينكم
نفسى أفهم هما بيسرقوا لمين لعلاء اللى محدش عارف هو فين ولا بيعمل ايه بعد ما كان طايح فى خلق الله وعمال يقاسم ويسمسر وياكل عرق الغلابة وخرب بيوت كتير ومنهم أحمد بهجت ،ولا بيعملوا ده لجمال اللى ربنا يشفيه _اللهم لا شماتة_ ولا لحسنى اللى محدش عارف إذا كان عايش ولا عند ربه
ولا لمين بالظبط الكفن مالوش جيوب حد يفهمهم ده
فين الشيخ حلاوة الملقب بشيخ الأزهر يقولوهم ده ولا هو مش فالح غير يفتى لنا بأحقية اولى الأمر فى الطاعة والولاء وبعد كدة يغرق فى الفتة والهوبر

سيبوا شبابنا متسجنوهاش يا فجرة ،أحلى شباب 6 ابريل والفيس بوك من تيارات سياسية مختلفة اتقبض عليهم وفى أمن الدولة محتجزين ومحدش عارف عنهم حاجة كل تهمتهم انهم بيحبوا البلد دى راحوا رسموا العلم على البلاج وبدأوا يغنوا للشيخ امام وهما لابسين تيشرتات مكتوب عليها 6 ابريل

طبعا ده معجبش بهوات الداخلية فقبضوا عليهم بنات وولاد ،أحلى ما فيكى يا مصر بيقتلوه الشباب والحلم والأمل
بس هما أغبيا مش فاهمين ان عمر السجن ما غير فكرة وان عمر القهر ما أخر بكرة
دى نص الرسالة اللى اتبعتت لى من شباب 6 ابريل وفيها اسماء ورد مصر اللى هيفتح غصب عن سلخانات العادلى وكلابه:
بعد اجتماع ناجح لشباب 6 ابريل فى مقر حزب الغد بالاسكندريه ولقائهم بعدد من شباب العاصمة الثانيه لمصر , خرج الشباب الى الشاطئ مرتدين تشيرتات الحركة ورافعين اعلام مصر وطيارة ورقية على شكل علم مصر. وفى تطور مفاجئ قامت قوات الامن بالاعتداء بالضرب على الشباب ورشهم بماده غريبه ومنهم:
احمد ماهر وضياء الصاوى واسراء مصطفى وقد تم القبض على كل من
خالد عادل
ماهينور المصرى
يوسف شعبان
باسم فتحى
مصطفى ماهر
عمرو على
نور الدين صبحى
مدحت شاكر
معتصم بالله محمد
طارق تيتو
محمد محمود
احمد نصار
احمد عفيفى


وبعد ان ألقت القوة الامنيه علي الشباب ذهبوا بهم لنقطة شرطة خالد بن الوليد وبعدها اصطحبتهم أجهزة الأمن إلي قسم امن الدولة بالمنطقة المعروف "بقسم الفراعنه


يسقط مبارك وكلابه وسجونه وتحيا مصر

1 comment:

صوت من مصر said...

فجره اه
ظلمونا اه
تعبنا اه
ربع قرن كفايه ولا ؟
حرام بجد ان طول عمرى مشوفش غير حيوان واحد بس
بجد تسلم ايدك ؟