Thursday, July 12, 2007

مين وائل عباس؟


وائل عباس المفترى عليه وهو أكبر من أي إفتراء
هو شاب من أجدع شباب مصراتبهدل كتيييييييييير واتظلم أكتر وأكتر لكن عمره ما اتخلى عن مبادئه ولا باع قضيته وكان دايما أكبر من أى لحظة انكسارشخصية أمام قضايا الوطن

وائل عباس عمره 33 سنة ولسة لا استقر فى شغل ولا كون أسرة ولا عنده رصيد فى البنك يا دوب حتة العربية القديمة اللى على طول عند الميكانيكي بتتصلح واللاب توب القديم بتاعه والحاجات دى اشتراها لما كان شغال فى وكالة الأنباء الألمانية قبل ما يطرد منها بأوامر أمنية بعد تبنيه نشر فيديوهات التعذيب اللي فضحت ابطالها من كلاب الداخلية و القريبين من وائل عاشوا معاه ا أزمة انكساره وحزنه فى الفترة دي ومنهم أنا وخالد البلشى وحسام الحملاوى ودماغ ماك وكتير من أصحابنا والغريب ان فى نفس الوقت ده كان فيه هجوم عنيف علي وائل واتهامه بإتهامات حقيرة من عينة انه عميل للأمن مرة يبقي أمن دولة ومرة تانية ربنا يكرمه ويبقي أمن قومى وبعد كدة خرج مجموعة تانية من الأشاوس يتهموه خير اللهم اجعله خير بالعمالة للمخابرات الأمريكية والدول الغربية التى تستهدف تشويه سمعة مصر المحروسة يعني لما كلاب الداخلية تعذب البشر فى الاقسام وتهتك أعراضهم وتلفق لهم تهم عمال على بطال ده عادى لكن لما وائل عباس والمدونين ينشروا يبقوا ولاد كلب بيشوهوا سمعة مصرويطلع لهم رئيس تحرير جريدة يومية شعارها "احنا لاجريدة قومية ولا معارضة احنا أمن" يقولك خدوا تمن عمالتهم للخارج جوايز والفيديوهات دي ملفقة ويقعد يهطل زى ما بيهطل ويشتم شوية في جورناله اللي ما بيتوزعش غير فى لاظوغلي وجابر بن حيان
والظريف دلوقت كمان اتهام وائل عباس بالعمالة لإسرائيل والشذوذ والقذورات اللى بيتكلم فيها اصحاب النفوس الضعيفة اللى معملوش نص اللي عمله وائل وعمالين بس يهبلوا علي الفاضي ويعبطوا بكلام سخيف ملوش أى أساس من الصحة
وائل عباس صديقي الجميل الطيب النقى الأصدق والأكبر مقاما من كل المدعين اللى بيشتموه وبيتهموه واللى فشلوا فى كل شئ حتى فى مهمتهم المقدسة لتشويه صورته

الف مبروك يا وائل الجايزة والله يا صاحبي انت اكبر من أى جايزة مهما كانت وعاوزة أقولك إن انت حواليك ناس كتير بتحبك وبتحترمك وكفاية اقولك إن خبر فوزك بالجايزة انا عرفته هنا من شاب عربى كندى بيحبك جدا وبيحترمك وبيعتبر مدونتك من أهم المدونات المصرية وفى رأيه الشخصي انها الأهم فعلا


فيفا فيفا وائل عباس

نقلا عن الوعى المصرى
وائل عباس يفوز بجائزة نايت الدولية للصحافة

Wael Abbas wins the 2007 Knight International Award for Civic journalism

صباح اليوم كنت أتفقد إيميلي كالعادة لأجد رسالة من المركز الدولي للصحفيين يخبرني فيه بفوزي بجائزة نايت الدولية للصحافةوجائزة نايت الدولية للصحافة هي من أهم جوائز الصحافة في العالم وهي اول من يعترف بمجهودات صحافة المواطن
وقد جاء في حيثيات الفوز ما يلي أن الجائزة مقدمة تقديرا لتفانيك في مجال الصحافة في مواجهة تحديات هائلة وإعترافا بمجهوداتك لتطوير إعلام مستقل عالي الجودة في مصر
وهذه مقتطفات من الرسالة التي تلقيتها

Dear Wael AbbasThe International Center for Journalists, a non-profit group that administers the Knight International Journalism Fellowships, congratulates you on receiving the 2007 Knight International Award for Civic journalismThe Award is a testament to your devotion to the craft of journalism in the face of overwhelming challenges and recognizes your efforts to promote high-quality, independent media in Egypt

جدير بالذكر أن هذه الجائزة حصل عليها عدد من أهم الصحفيين الأمريكيين ومن مختلف دول العالم مثل
توم بروكو من شبكة إن بي سي والذي قام بتغطية تفجيرات أوكلاهوما وسقوط حائط برلين وحرب فيتنام وكان أول من حاور ميخائيل جورباتشوف وبوب شيفر من شبكة سي بي إس ومقدم البرنامج الشهير فيس ذا نيشان وهو الذي أدار المناظرة بين بوش وكيري وشذا الجابوري مراسلة البي بي سي في العراق وخوسيه أنطونيو بيلا مصور أسوشيتدبرس
جريدة الوعي المصري الإلكترونية


7 comments:

خالد البلشي said...

عملتيها وسبقتينى يا بنت الأيه بجد تدوينه حلوة ووائل يستاهل أكتر منها فيفا وائل عباس ..فيفا عبير العسكرى
ويسقط يسقط حسنى مبارك

ذو النون المصري said...

وائل لم يعتبر نفسه قدوه لاي احد لكن بالرغم من ذلك فهناك شباب كثيرين اتخذوه قدوه لهم و هو فعلا يستحق و انا من الناس التي تقدره فعلا و مدونتي يوم قررت انشائها كان ذلك حسدا له لكن طبعا كان تفكيري بعيد تماما عن النواحي السياسيه لانها ليست من اهتماماتي الاولي
عموما اتمني لوائل التوفيق و الاستقرار في العمل و الاسره و في امور حياته المختلفه
تحياتي

Anonymous said...

حرام عليكم يا ولاد اللذين خليتوني ها أعيط
بجد مش عارف أقولك إيه يا عبير
أنا مش باعرف أعبر عن مشاعري كويس بس أنا متأكد إن اللي بيفهموني كويس وقريبين من قلبي بجد بيحسوها لوحدهم من غير ما أحتاج اقول حاجة
انتي وخالد وشلة الدستور والنهار والبديل والمركز
ناس فضلت تعرف بعض رغم تغير المكان والزمانو الحدث
ويارب دايما
والف شكر ليكي ولكل اللي علق وها يعلق
امواه

DantY ElMasrY said...

هى دى عبير اللى أنا عارفها
أما وائل فهو فوق كل وصف كصحفى دى تقدرى تتكلمى فيها يا عبور زى مانتى عاوزة لكن كإنسان فوائل عباس انسان طبيعى جدا ولا يلبس اقنعة ودى صفة من النادر تلاقيها فى الناس الكويسة
.ألف مبروك يا وائل
عبير ..كنت عاوز أقول حاجة بس نسيت

Unknown said...

بمناسبة احتفالات ثورة يوليو أنا عاوز المصريين يفتكروا قائدها اللواء محمد نجيب فلو عايز (ة ) تشارك (ى) فيها أنا حاطط على المدونة بتاعتى كود لصورة نجيب ممكن تحطيها فى
add page element html/java code
وده لحد يوم 23 يوليو مع انى عارف ان ده مش هيعوضه هو ولا أسرته عن اللى اتعمل فيهم بس يمكن تنجح المحاولة ويزور قبره رئيس الجمهورية ويقراله الفاتحة أو يكتبوا فى كتب التاريخ اللى مزورينها انه كان أول رئيس لمصر
شكرا عبير

vision said...

وحشتيييييييييييييييييينىىىىىىىىىىىىىىىىىىىىىىىىىىىىىىىىىىىىى انتى


الف مبروك يا وائل يا عباس

Desert cat said...

هايله يا عبير دايما سباقه كدا
ووائل يستاهل كل خير
الف الف مبروك يا وائل