Monday, May 28, 2007

غريبة بس مش خايفة




رغم ان النهاردة سادس يوم لى فى تورنتو إلا انى باشعر انه اليوم الأول يمكن لأنى بدأت أتجاوز أحاسيس الخوف والغربة اللى كنت مسجونة جواهم أو يمكن لأنى اتغلبت على إحساسى بالخوف ورجعت تانى عبير العسكرى القوية المتماسكة زى ما البلشى طلب منى ،بالنسبة لى كان الجديد هو الإحساس بالخوف والقلق والضعف لكن الاحساس بالغربة ده احساس طبيعى عندى لأنى كنت باقول كتير لخالد انا عارفة انى مجرد ضيفة فى الحياة اللى كانت دايما بتبخل على بالإستقرار.. مريت بأماكن كتير وناس أكتر لكن عمرى ما دقت طعم الاستقرار فى مكان أو فى علاقة انسانية واكيد طبعا العيب فى مش فى الناس

بجد عمرى ما كنت احب يكون لى مدونة لأنى ما اعرفش أعبر عن نفسى كويس وكمان لانى متعودتش احكى عن اللى جوايا لحد وده مش غموض زى ما كتير بيظنوا ولكن لأنى مش عاوزة أكون عبء على حد ويبقى مجبر على سماعى أو دعمى نفسيأ فى الكثير من حالات الإغتراب والإحباط وأحيانا الإنكسارات التى بتسيطر على لكن انصياعا لرغبة الجميلتين أميرة هشام وسهير أباظة كان لازم أدون واكتب لهم أخبارى فى المدونة اللى نجحت أميرة فى انها تصممها لى فى 10 دقايق وتقولى بمنتهى البراءة "خلاص انت كدة مش مطلوب منك أكتر من انك تدونى لأن المدونة دى هى همزة الوصل بيننا"وطبعا لم أستطع أن أخذلها رغم انها قاسية وشريرة ونجحت فيما فشل فيه الكثيرون وفعلا اسم المدونة مناسب لى جدا "غريبة" .. وبالنسبة لشغلى يا ست أميرة اطمنى انا بدأت التدريب فى التليفزيون الكندى وكمان بدأت الكورسات بتاعة اللغات وفى كلام على شغل مع قناة تليفزيونية جديدة هى مستقلة واتكلموا معايا بس لسة الإتفاق النهائى بكرة ان شاء الله..هنا مؤمنين جدا بدور الشباب وتطويرهم وتدريبهم على كل فنون العمل الصحفى والتليفزيون والراديو ومفيش تمييز بين المصرىوالكندى والصينى والامريكى كلنا زى بعض واللى يفرق بينهم هو مدى الكفاءة المهنية وإحترام الزملاء طبعا حرية النقد مكفولة من أول يوم بدون استئذان من رئيسك
كلمة أخيرة لكل صحابى و زملائى بجد وحشتونى كلكم وخصوصا
خالد البلشى : صديقى الصدوق وأخى الذى لم تلده أمى و أعز الناس عندىوكفاية كدة
سهير :كان نفسى السفر يتأجل شوية وما نتقابلش فى الوقت الضايع زى ما قال أسد لكن بجد انت صديقة واخت بالنسبة لى وما تقلقيش لما تتجوزى هاحاول انزل
الدرينى:.أخى الصغير الذى أحبه من كل قلبى اتمنى من ربنا يفضل قلبك أخضر كدة وجميل زى ما انت
اميرة هشام : الصديقة الصغيرة الجميلة النقية التى استطاعت ان تحتل مكانة كبيرة فى قلبى فى وقت صغير جدا
محمد على : الشاب الجميل الذى سعدت بالتعامل معه وأراه صحفي جميل وانسان أجمل هو بس محتاج تفك شوية سيب نفسك للبلشى والدرينى وانت هنجيبك كل يوم من قسم بالمناسبة شكرا على تعبك فى تطوير المدونة وشكلها بجد جميلة أوى
ابتسام تعلب : اتمنى تكونى رجعت جميلة زى ما كنت وتبقى فى وسط صحابك وإخواتك وبجد انا بحبك ونفسى اسمع أخبار كويسة عنك طمنينى عليك
أسد: صديقى اللى مونسنى فى بلاد الغربة ويا رب ما اتحرم من الشات معاك بس متركزش أوى على حتة لبس الحجاب فى كندا وشكرا على واجب الطيارة اللى ما اتخطفتش يا جميل
رشا جدة : وحشتينى ويا رب تكونى بخير واتعودت على طحنة البلشى فى الشغل
مالك : شكرا على اهتمامك بى قبل السفر وما تنساش تاخد بالك من السيكو سيكو وتحطها فى عنيك وتبعتوا لى لما يبقى فيه حاجة قريب ربنا يوفقكم
أيوب : معلش يا صاحبى ما تزعلش ملحقناش نقعد مع بعض قبل السفر بس تتعوض بالايميلات وسلم لى على الجميلة بسمة
وائل عباس : انت عارف انت ايه بالنسبة لى خد بالك من نفسك وخليك أكبر من أى صغائر لأن انت فعلا كبير ومقامك عالى ويا ريت علشان خاطرى متردش على أى حد ملوش لازمة وبيشتم لان الشتيمة وإتهام الآخرين دى حيلة العاجز والعميل الحقيقى وبعدين ما احنا يا ما اتشتمنا وهانتشتم يا وائل ركز فى مستقبلك وحياتك
دكتور محمد سيد السعيد : احبك كثيرا وأجلك لدرجة كبيرة جدا فأنت قيمة حقيقية واسم تمنيت أن أعمل معه يوما ما لذا اسمح لى بسعة صدرك المعتادة أن أقول لك أنى أتمنى من خالص قلبى أن تدرك حجم المخاطر التى تهدد الجورنال وأن تؤمن بأن الشباب هم أداة النجاح لأى تجربة صحفية الآن وأن أزمة البديل الحقيقية فى سيطرة الشعر الأبيض على مقاليد الأمور وإفتقاد المعايير المهنية فيمن تولوا مناصب تحريرية هامة والإصرار على تحقيق تجربة السبعينيات فى عام2007 فتجربة البديل ليست فقط تجربتكم وانما هى أمل شباب طموح لتحقيق تجربة صحفية ناجحة ومحترمة ....وهذا الكلام اكتبه على الملأ حتى لا يقال انه نميمة الهدف منها النيل من أشخاص بعينهم
استاذ محمود الوردانى : فين الشغل؟؟؟؟؟؟؟؟؟؟
عبد الستار:بجد وحشتنى جدا قعدتنا فى مكتبك دايما عامر بأصحابك، وسلم لى كتير على أستاذ طارق والجميلة رشا





54 comments:

اميرة هشام said...

الساعة عندنا دلوقتي ياعبير 4 الفجر

وانا عندي امتحان كمان كام ساعة

بس لما دخلت وعرفت انك كتبتي بوست كان نفسي اكون اول واحدة اعلق عليه

والغريب ان تحققت امنيتي

مع ان جهاز الكمبيوتر كان عليه باسورد ومكنتش عارفة ادخل خالص عليه حتي عشان اجيب حجات ضروري للامتحان


كلامك ياعبير عندي في المدونة كان هيخليني اعيط

لان في اللحظات دي بالذات كنت حاسة بالوحدة اوي وكنت متضايقة جداجدا جدا

بس لما شفت تعليقك وشفت البوست بتاعك وشفت صورك كل حاجة هانت

وبجد بقيت مبسوطة اوي

خلي بالك من نفسك ياعبير

وعايزاكي تتفوقي عليهم كلهم

وانتي بجد مش اوحدك لان كلنا معاكي

احنا كلنا مع بعض بروحنا حتي لو فرقت بينا المسافات

خالد البلشي said...

ازيك يابت
انت عاملة ايه تعرفى انك دخلت عالم التدوين فى نفس اليوم اللى دخله فيه احمد فؤاد نجم
شفتى ازاى انك مهمة حتى وانتى فى كندا
بالمناسبة انا مبسوط جدا انك تجاوزتى كل مخاوفك
ومبسوط اكتر لأنك بدأت تصنعى عبير حقيقية
سيبك من العالم الواطية بتوع امن الدولة واللى فوقهم واللى فوق فوقهم
عايزينك ترجعى لينا اقوى مما كنت وافضل
شوفتى الفرق بين مجتمعنا اللى بيقهر ناسه والمجتمعات التانية اللى بتقدر الناس لمجرد انهم ناس وبس من غير اى حاجة تانية
وشوفتى افرق بين امجتمعات اللى بتحرم الشباب والمجتمعات اللى بتعتبر الشباب اللى عندهم كام وعشرين سنه عيال وشايفة ان الحل فى الشعر الأبيض
شوفتى الفرق بين المجتمعات اللى بتحط خط احمر على اى علاقة صداقة حقيقية بين ولد وبنت والمجتمعات اللى بتقدر علاقات البشر صح
بالمناسبة دى مش نظرة دونية لنا ولكنها محاولة لتوصيف وضعنا صح يمكن ييجى يوم ونبقى بنى ادميييييين
تحياتى ياأعز اخت واغلى صديقة

تعرفى انى متضايق لأن البنةتة اميرة هشامسبقتنى فى التعليق عذرى الوحيد انها اللى عملت المدونة

Dalia Ziada said...

عبير, مش عارفة عاوزة أقولك حمد الله على السلامة و ع الاستقرار أخيرا

بس مش عارفة إن كانت في محلها

بس بجد أنا عاوزاكي تنسي كل اللي عدى من حياتك و ما تفكريش غير في اللي جاي, ركزي قوي و أكيد طموحك الجميل هيكون سبب نجاح كبير في المستقبل, و مشاعر الغربة و الحاجات دي هتكون بعد كده و لا حاجة و ما لهاش أي تأثير

تحياتي لك و للصديقة صاحبة فكرة المدونة لأنها هتخلينا نطمن عليكي بسهولة

sohier said...

kont haktyeb franco arab w oult man3an lel shatema menek a2aleb 3araby:)

صباح الفل يا ست الكل:)

وحشانى أوىىىىىىىىىىىىىىىىىىىىىى

كل ما أنزل وسط البلد تبقى فى مخى و أقعد أفتكرك

فكره لما كنت عايزه تقعدينى أنا و أميره هشام على قهوه و ٌأعدت أنا و هى نفلفس منك
و كانت أول شتيمه تطلع منى لما مشتينا فى شارع أقل ما يقال عليه " ..."

فكره لما قلتلك "يا عبير لو أنا عيانه ينفع ترجعى" سكتى و يعدين قلتلك "طب لو مت؟" قلتى و أنا هعملك إيه يعنى هتكونى مت هعملك إيه بعد الموت..:(

فا قلتلك طب لو أتجوزت قلتيلى لأ..هاجيلك

طيب يعنى أبو الجواز أنا مش عايزه أتجوز أنا عايزه أشوفك

مبسوطه بصورك أوى حلوه جداً

أرفعى راسنا يا عبيير


وحشانى و هتوحشينى:(

خلى بالك من نفسك

أشتغلى حلو و انا حاليا بحاول اجيلك أجازه

متفضحيناش أودام الأجانب خلى صوتك واطى و بلاش شتايم

سلام يا أختى الحبيبه

AUCWORKERS said...


ترجع بالسلامة يا كابتشن ومتاكليش العيال عندك,وعلى الله أمطار كندا تغسل أرواحكم وترجعوا نضاف من وغش القومجيه.
وقت ممتع في كنكا ياخالتشي

Anonymous said...

ها توحشينا يا بت
مبروك على المدونة
مش عارف ازاي اقتنعتي
مع اني ياما حاولت اقنعك
بس عموما المهم انك اقتنعتي
واهلا بيكي في عالم التدوين
وشكرا على النصيحة

Ebtsam said...

بناء على الحاح استاذ خالد على انه يقعد ع اللاب توب بتاعه ..ذل تقولى ايه .. مضطرة اختصر ف الكلام واقولك بجد وحشتييييييييينى كتير جدا
واطمنى انتى سايبة راجل وراكى يا معلم

Anonymous said...

إزيك يا عبير وحشتيني اوي خلصي بأه وعلمي الناس الجهله اللي في كندا صحافه,علميهم ازاي يكتبوا,علميهم ان النسر المصري شق السما.
بجد مفتقداك,ومستنية رجوعك بعريسك الكنكي.

Anonymous said...

إنتى عبير العسكرى إياها، أول مرة أدرك كم يغير الحجاب من شكل المرأة، أنا لست ضد أو مع ما فعلتى، لكنى حقيقة مستغرب على مستوى جمالى بحت كم غير فيى شكلك خلع الحجاب، بدوت أكثر بياضا، وأطول، وأضخم قليلا، وأقل حدة فى الملامح، ربما لأنك أمامى فى صورة قديمة لك فى مظاهرة بينما صورتك الحالية تجعلنى أحس أنك أصغر، هل بدا كلامى كأننى أهنئك على خلع الحجاب، الحقيقة أننى ليس لى رأى فى الموضوع وأفضل ألا أخوض فيه، لكنى أود لو أعرف فيم تفكرين وأنت فى بلاد الكنديين ترتدين مثلهم وتحاولين رغم التعثر التحدث بلغتهم، هل تصيبك نعرة خصوصيتنا أم تشعرى بالتوافق مع الجديد الذى تعيشينه، أرجو أن يكون جزء من تدوينك حول ما تشعرين به من تغير، يتجاوز الشكل حجاب من عدمه، إلى الجوهر كيف تتغير أفكارك وماذا يعجبك ومالا يعجبك خصوصا وانك ستعملين فى قطاع اعلامى فى بلاد ترانا بصورة لا تعجبنا أحيانا ونجدها خاطئة أحيانا ونجدها متحيزة أحيانا ونجدها قاسية فى صراحتها وصدقهاأحيانا

السلحفاة تطير said...

اجمدى يا عبير .. عايزينك ترفعى رأسنا .. مش عارف أقولك ايه تانى بس الحياة مليانه أمل وسعادة .. امسكى فيهم على قد ما تقدري

ايــــــــــــــــــوب said...

وحشتينا
الفكرة فى الوحشة هنا مش انك مش موجودة وبس ، الفكرة انك يا ست عبير كنتى عاملة حالة غريبة
اول ما عرفتك كنت بقول البنت دى بميت راجل
وبعد ما عرفتك لقيتك بميت بنت
وفى الاخر اكتشفت انك بميت انسان
وبين مواقف الرجال المائة وحنان الاناث المائة ومشاعر مائة انسان تكمن الحالة الغريبة المسماة عبير العسكرى

أحمد حربية said...

أقول إيه بعد اللي اتقال ده بس؟
علي العموم بما إنك ناسياني علي طول و بما إني ما شفتكيش قبل ما تسافري بفترة كبيرة فاهاقولك واحشاني جدا،وهاقولك كمان ما تنسيش وانتي قاعدة في وسط البلد علي البورصة بتاعة كندا تبقي تذكريني ...بالخير ها؟
حربية

مُرَاقِبْ مِصْرِي said...

عبير يا عسكري

وحشاني فعلا وواحشني النقار معاكي... ألف مبروك المدونة وعالم التدوين نور... الواد أسد بيفكر يعملك وزيرة إعلام ما بعد الثورة الليبرالية الجهادية... مع إن رأيي الداخلية هتنور بيكي

ههههههههههههه

أهم حاجة إعملي زي ما البلشي قال لك وبإذن الله هتلاقي نفسك وهتحققي اللي ما عرفتيش تحققيه هنا... وحشانا كلنا بجد وربنا يوفقك

مُرَاقِبْ مِصْرِي said...

أنا على فكرة متفق مع الأخ عويس في إنك إحلويتي أوي ووشك نور... بركاتك يا كندا
:D

husam shady said...

أنا قلت ادخل أبارك
وأقول مساء الخير يا أستاذه عبير
تحياتى

Anonymous said...

الغربه مره الغربه عزاب بس برضو احسن من هنا عايز تعيش حر عيش بره مصر ربنا يجبك بالسلامه اول مره ازور مدونتك واقتحم عالمك وفقك الله وتقبلى صدقتى

Anonymous said...

كويس أنك سافرتي في الصيف، بيقولوا الجو عندكم هيبقى برد قوي قوي قوي قوي في الشتاء

مبروك على المدونة و مش هوصيكي تنبسطي و تتعلمي.

هو ايه موضوع الحجاب اللي شغال على التعليقات ده؟

أحمد الدريني said...

عبيرو
واحشاني مووووووووووووووووووووت يابنت اللذينا
ببعت لك علي ميل الياهو ومش بتردي علياعايز اسلم عليك ياندلة
واحشاني والله
وواحشني ذكري اولاجتماع
طبعا فاكراه ياوغدة...........
شايفك وانت بتبسمي دلوقتي
ردي عليا عشان احيكلك واشيت معاك زي الناس ما بتشيت معاك ياوغدة
تحياتي ليكي يابيرو
ومتنسيش الخلاط

lo2lo2 said...

يا بت ينيلك مش تقولى انك مسافرة انا ما عرفتش غير النهاردة من الاميل عموما يا مزة خدى بالك من نفسك اوعى حد يضحك عليكى حد يقولك تعالى ياشاطرة اوديكى عند ماما عند بابا قوليله لا حد يقولك يا حلوة انتى تايهه ولا ايه تعالى اوديكى البديل برده تقولى لا لكن لو حد قالك بقى تعالى معايا اجيبلك حاجة حلوة وافسحك تقوليله على طول كس امك
هاتوحشينى وانا مش هاقولك انا مين هاسيبك تعرفى لوحدك وابعتلنا بقى مغامراتك ى تورنتو وانا هابعتلك نمات كتير من مصر

Bassma said...

عبير الجميلة .. بالرغم من ان تاريخ طويل لم يجمعنا .. و معرفتي بيك لا تتجاوز شويه شهور شفتك خلالهم مرات معدوده ..لكن حقيقي كانت مرات مؤثره اوي .. حسيتك اوي و حبيتك اوي

كوني دايما كويسه .. كوني عبير الانسانه التي طالما ابهجنا وجودها الراقي

Anonymous said...

مساء الخير ياعبير
انا واحد انتي متعرفهوش خاااااااااالص بقى
بس انا اعرفك كويس وقابلتك كتير
بس بفتكر يوم ما حصل إعتداء الامن على المتظاهرين في المظاهرة يومها كنت انا خارج مصر وكلمت أستاذ خالد البلشي على موبيل الدستور ومعرفش اذا كان يفتكر كده ولا لاء...كلمته علشان اطمن عليكي
كمان عايز اقولك اني تماما زيك في الغربة بعيد عن مصر ومن سفرية لسفرية ومن بلد لبلد ...شدي حيلك وخلي بالك من نفسك....تحياتي
وليد ( بحبك يابلدي مهما عملوا )مشرف مندرة كفاية للأقسام السياسية

Anonymous said...

سؤال ممكن يكون سادج شوية
انتي ايه اللي سفرك انت ووائل عباس
اطردوا من مصر على ايد النظام ؟؟؟
ولا ايه سبب السفر
ولا مجرد صدفة

Ahmed Ateyya said...

يا تري القناة التليفزيونية المستقلة عي Real News TV?

لو مش هيه..بصي عليها..التدريب فيها بس ب 12.5 دولار في الساعة ..

http://www.therealnews.com/web/index.php

هو موجود في تورنتو باردو...رينا يوفقك
أحمد عطية

Bou-ME said...

نورتي التدوين يا عبير :):)

Anonymous said...

الف مبروك على المدونة يا ستى ، وألف مبروك برضه على الاستقرار .

تعرفى انا انبسطت انى اطمنت على اخبارك ، بس زعلت لما شفت الصور ....
انتى عارفةليه طبعا ..

عموما ربنا يكرمك فى الغربة ويحفظك من كل شر ، مع انه بالنسبة ليكى هيبقى اى شر احسن من هنا ،

Taeralshmal said...

الأخت عبير،
تمنياتي لك بوقت طيب، وبأقصى درجات الاستفادة من تواجدك في كندا، فقد تكون الغربة هي المعلم الأول إن أحسن المغترب مداخلها، ونهل من تجاربها، وجمع بين الثقافتين، ثقافة الوطن الأم ومكان الاغتراب المؤقت أو الدائم.
أيامك الأولى في الغربة تذكرني بأيامي الأولى عندما تغربت في رحلة طويلة امتدت لأربعة وثلاثين عاما ما بين بريطانيا وسويسرا والنرويج
مع تحياتي الطيبة

محمد عبد المجيد
طائر الشمال
أوسلو النرويج
http://Againstmoubarak.jeeran.com/
http://taeralshmal.jeeran.com/
Taeralshmal@hotmail.com

karakib said...

يا الف مرحب بالناس المحترمه

elkamhawi said...

مبروك على المدونة يا عبير
وان شاء الله ترجعلى بالسلامة

دماغ ماك said...

wa7ashteny ya gazma

.:.-=- ELGaZaLy-=-.:. said...

انا يمكن معرفكيش خالص

بس جيت هنا من مدونة مالك كان كاتب بوست عنك وكدة

تعرفى لما قريت ردود الناس عليكى ...

وكلامك

فهمت

الى زيك مش بيحس بغربة لانة

علطول فى قلوب الناس

ترجعى بالسلامة...انا بحب مونتريال جميلة بجد

ويارب تكون بطلت مطرة البلد بتبقى حلوة اوى لو مفيش مطر

دعواتى لكى بالتوفيق

Anonymous said...

وحشانى أوى يا عبير وانا زعلان منك لأنك ما بتسأليش علينا . بوشى ونانو

Anonymous said...

مااعظمك بالحجاب
نتمنى خذف هاتان الصورتان لك دون حجاب
ونشكر جميع الاصدقاء الغيورين على بنات مصر وبالأخص عليك من هذه الصور

rana 3amra said...

انا كمان يا عبير مش عارفة ليه سافرتى ولا هو كل الشباب مش طايقين ام البلد
ترجعي بالسلامة يا رب
وخليكى قوية بجد الدنيا دى عايزة واحد بااااااااااااااااارد

Anonymous said...

وحشانى اوى يا عبير وخلى بالك من نفسك وطمنينى عليك دائما وباستمرار ولا تنينسناوكلمينى دائما على التليفون أو النت فى الوقت التى تحددينه. بوشى ونانوومامى وتيته وجدو

Anonymous said...

مساء الفل يا فل وحشانى جدا مش هتيجى تقعدى معانا زى كل اسبوع ولا انتى هتنسينا افتكرى دائما انى فى ناس بيحبوكى وعايزين يطمنوا عليكى دائما باستمرار.بوشى ونور ومامى والموجودين هنا ردى علينا

Anonymous said...

هاى

Anonymous said...

مساء الخيرات

Anonymous said...

ازيك يا عبير

boshra mohamed said...

مبروك على المدونة
وصدقينى حتخفف عنك الغربة كتير
وخصوصا مع كل الناس اللى بتحبك ديه

وليد said...

كتير حاولت اتابع اخبارك
طبعا حضرتك لا تعرفين لكنى كنت قارئ لما تكتبين أيام الدستور
الأن قاطعت الدستور وغيرها من الصحف لا شئ ثمين فى هذا البلد الكل معروض للبيع أو ربما يتمنى أن يعرض للبيع... أو يقتات على محاولة جعل نفسه غير معروض للبيع
دعك من هذا

المهم أننا وجدنا نافذة نطمئن بها على قلم كان يكتب بقوة
نطمئن على من حاولوا ان يهتكوا جسدها وفكرها وقلمها

بغض النظر أنها الأن هتكت حجابها بيدها وظهرت بصورة غير التى عهدناها عليها... دون غطاء للشعر
على فكرة هذا شئ جميل جدا جدا
شخصيا لا احب هذا النوع من غطاء الشعر
الحجاب اسمى من كونه طرحة تغطى الشعر
هو معنى وقيمة واسلوب حياة لن يتماشى بأى حال من الأحوال مع لفظة ( يا بت ) أو يا (جذمة ) التى يخاطبك بها البعض


على العموم.... بالنسبة لى يهمنى أن تكون ناجحة فى عملك وأن يعوضك الله بما هو خير وان يحفظك من كل الشرور

شمعى أسعد said...

مبروك المدونة

Anonymous said...

إزيك ياعبير

ربنا يحميكى من عيون البنات الضعفانه
ماشاء الله

أسد ياولاد

حبيت أصبح

غريبة said...
This comment has been removed by the author.
غريبة said...

بجد موضوع الرد على التعليقات ده مرهق جدا وبياخد وقت كبير اوى لكن كان لازم أرد علشان الايميلات الكتير اللى جت لى من أصدقاء شرفونى بتعليقاتهم واتهمونى بتجاهلهم وعدم الإكتراث بيهم بس والله ده ما حقيقى أنا بس مطحونة والله أعلم بى وعلشان أكتب الرد ده قعدت يومين أسهر للفجر علشان اشوف التعليقات وأرد عليها وبعد ما نشرتها فعلا لقيتنى ناسية أرد على بعض الأصدقاء فمسحت الرد وكتبته من أول وجديد فاعذرونى فى حالة وجود أخطاء مش شايفة أصحح عايزة أنااااااااااام
خالد البلشى
انت صحيح ما لحقتش تكون أول تعليق على التدوينة لكن هتكون أول حد أرد عليه يا أجدع أخ وأقرب صديق لقلبى يعنى بينك وبينه أد شارعين كده أكيد وحشاك خفة دمى دى وخصوصا انى دمى خفييييييييييييييييييف أوى
كان عندك حق بجد التجربة هنا مختلفة تماما وما تقلقش انا لا بافكر فى الإيميلات اللى اتسرقت ولا السخام اللى بيتبعت منها انا باحاول انسى كل القرف ده علشان أعرف أصنع عبير حقيقية أقوى بكتير وهاصنعها إن شاء الله
ومعلش يا صاحبى انا قرفتك كتييييييييير وسخفت كتير وحملتك قرف احساسى بالغربة والوحدة لكن انا وعدتك انى مش هاكرر ده وبجد هاتعامل مع الواقع الجديد اللى انا عايشاه ومش هاضايقك انت والناس تانى وده وعد
اميرة هشام
بجد وحشانى اوى يا جميلة خدى بالك من نفسك وأنا عند وعدى ليكى إننا نعمل تحقيق مشترك بس خالد يوافق
وانا متابعة أخبارك ومدونتك وزى ما اتفقنا انا دايما جنبك
كبر دماغك
انت كمان وحشانى اوى اطمنى على انا كويسة الحمدلله ،انا دلوقت مش قلقانة عليكى لان حواليكى مجموعة بتحبك بجد وهتحافظ عليكى بس ابعدى عن أى قرف بيحاوطك
ابتسام
انا عارفة انك بنت جدعة ممكن تشطح شوية لكن بترجع لطبيعتها الطيبة بسرعة وزى ما قلت لك متستعجليش واتعلمى وهتبقى صحفية شاطرة وبالمناسبة انت الأخبار بتناسبك أكترلانك نشيطة وبتتحركى كتير كونى مصادر ودوسى طمنينى عليكى على طول
رشا
حاضر يا معلم طلباتك أوامر بس لو ما لقيتش عريس كنكنى ما ارجعش ولا ايه؟
3wies guirgis
عجبك كدة جبت لنا الكلام على قلع الحجاب الله يسامحك ،عموما انافعلا هاركز فى رصد مظاهر التغيير اللى هتطرأ على بس يارب محدش يشتم ويقولك الناس طلعت من جلدها والحوار اللى بالك فيه بس اهم مظاهر التغيير دى حاليا انى مع الأسف بقيت أتكلم بصوت واطى وما با شتمش حد وبانزل مظاهرات وأرجع من غير ضرب وبهدلة حاجة قرف
السلحفاة تطير
محمد الجميل اللى فرحانة انى اتعرفت عليه قبل ما اسافر صحيح مش فترة كبيرة لكن بجد بقى حد غالى عندى جدا وعلى طول بيسأل على يا رب ما اتحرم من ايميلاتك ولا رسايل الموبايل ولا الشات معاك والأهم من ده كله يا رب تسمع كلامى وتنفذ نصيحتى ومتخليش النور يقطع تانى وانت بتشيت معايا فاهمنى طبعا؟
أيوب
مش عارف أقولك ايه بعد الكلام ده وربنا يكرمك ويسترك على الكلام الحلو وبجد انت صاحب جدع أوى أوى أوىىىىىىىىىىىىى
مالك
ما تقلقش يا مالك هنا بجد البنى آدم ممكن ينضف من حاجات كتير زى الكذب والتعصب والتآمر عمال على بطال ويتعلم كمان إزاى ممكن يكون الحوار مع الآخر والخلاف معه فى وجهات النظر دون الإستخفاف برأى الآخر أو تجاوز حدود الإحترام معه وعموما ماشى يا عم الحلو لما انزلك بقى انت بتشتم الناصريين مااااااااااااااااااشى
وائل عباس
حاولت كتير يا صاحبى أعلق على تدوينتك اللى اتكلمت فيها عن انفصالك غن صديقتك والضغوط اللى حواليك بس بجد مقدرتش لأنى مريت بنفس الظروف دى قبل السفروحسيت بجد بألم التجربة وعارفة أد إيه بيبقى عميق ومفيش أى كلام ممكن يفيد فى الوقت ده وعارفة إن أكتر شىء بيوجع هو الإحساس بالغربة والوحدة والقهر فى بلدك والابشع ظلمك من اللى حواليك اللى دايما بيشككوا فيك وبيتهموك عمال على بطال لكن بجد اصبر يا صاحبى بكرة إن شاء الله أحسن وبتاعك وسيب اللى يشتم يشتم واللى يشكك يبقى مع نفسه وحاول تبقى أكبر من كل القرف ده وخليك مع صحابك اللى بجد بيحبوك وبيحترموك لأنك بجد دورك فى فضح وساخات الداخلية وسادية ضباطهم معروف للجميع
وعايزة أقولك إن الناس هنا لما شافوا الأفلام عندك على الموقع على طول بيسألونى عليك وقلقانين عليك خد بالك من نفسى يا صاحبى وتجاوز أحزانك وآلامك واستمر يا صاحبى تضحك بس بطل تشتم بروح أمك وطبعا بعد ردى ده أكيد هاتشتم معاك من بكرة بس عادى الشتيمة ما بتلزقش والشتيمة أم ودنين بيتشتموها اتنين ولا ايه؟
سيبك بقى من كل اللى فات ده يا ساداتى يا بن( ......) بتخلى خالد والعيال يزحلقونى علشان تاكلوا فى كوك دوور يا خى تطفحوه يا بعيد آمييييييييييييييييييييييييييين

أحمد حربية وسيد تركى
الأخين الحلوين خلف خلاف ربنا يخليكوا لبعض دايما ،انا ما اقدرش انساك يا حربية انت هتنكر انى بعت لك رسالة قبل السفر وانى اول ما عرفت انك تعبات كتبت لك تعليق خسارة فيك فى تدوينتك عموما يا رب تكون بخير دلوقت وهاقولك تانى اراجع الروشتة اللى كتبتها لك وانت تبقى زى الفل وفكك من الواد الاشتراكى لا مؤاخذة يا ابو السييييييييييييد يا عسل
مراقب مصرى
الله يحرقك يا واد واحشنى ومش لاقية حد انا قر معاه وبطل كل شوية تقولى هتمسكى وزارة الداخلية بعد ما أسد يمسك الحكم علشان اسمك العسكرى بدال ما عمك عادلى تكبر فى دماغه ويعمل للواد قضية قلب نظام الحكم والتخطيط للوصول للسلطة ويعملى امر إعتقال آجى مترحلة وحياة أمك وبعدين ما لقيتش اسم لمدونتك غير المراقب دى كده عبد الله كوكو هيقلق على نفسه ما هو مراقب هو كمان
Husam
الله يبارك فيك يا باشا وبجد أنا با موت فى صورة الطفل اللى نشرتها فى تدوينة "إلى عساكر المرور الخاصين" لأن ده فى رأيى شعار المرحلة والصورة دى كانت خلفية الموبايل بتاعى
عمر الشرقاوى
نورت مدونتى ومرحبا بإقتحامك لعالمى و يشرفنى صداقتك أكيد
داليا زيادة
ربنا يخليكى يا جميلة أنا فعلا باحاول انسى علشان أعرف أعيش وانت كمان خدى بالك من نفسك ،أنا باطمن عليكى من مدونتك ربنا يوفقك
Alaa
الكبير كبير يا معلم واحشنى اوى انت والجميلة منال ،ما تقلقش وصيتك هتتنفذ وفعلا مش عارفة ايه موضوع الحجاب ده الله يحرقه مراقب مصرى غاوى يولعها وخلاص هيهدروا دمى بسبب تعليقه
درينى
أخويا الصغير اللى على أد حبى ليه على أد ما كنت زعلانة منه علشان ما بيسألش على لكن اول ما بعت لى نسيت على طول زعلى وقلقت عليه يارب يا حبيبى تكون بخير وطمنى عليك ابعت احكى لى التفاصيل لأن انا كمان كان نفسى أكون جانبك دلوقتى وتأكد إن الغربة تفرق الأجساد مش الأرواح ولا ايه؟ ،وبعدين يا مجرم انت محتفظ بالفاكس اياه مش علشان ده أول فاكس يجى باسمك لأ ده علشان اسمك كان جنب اسمى هههههههههههه
Lo2lo2
ازيك يا حبيبتى عاملة ايه يا رب تكون كويسة والدنيا متظبطة معاكى ،ابعتى لى قولى لى عملتى إيه فى اللى بالى بالك وبالمناسبة الظاهرة اللى انت شوفتيها فى مصر وما لقيتيهاش فى فرنسا انا كمان ما لقيتهاش فى كندا ووصلت لنفس النتيجة بتاعتك العيب فينا يا فى حبايبنا ، انا مستنية النمات الكتير اللى هتبعتيها لى وما تقلقيش من حكاية الحاجة الحلوة دى اطمنى خاااااااااااااالص انا مليش تقل على الحاجات الحلوة
بسمة
أنا كمان يا قمر حبيتك من ساعة ما شفتك فى حفلة الخطوبة بس حكاية إن وجودى بيبهج حد حساها كبيرة أوى على خدى بالك من نفسك ومن نصك التانى لأنه بيحبك أوى ويا رب اسمع خبر حلو قريب
وليد مشرف مندرة كفاية للأقسام السياسية
خلاص يا سيدى آدى إحنا اتعرفنا من غير وسيط لا مؤاخذة يا خلود ابعت لى على طول وانا هارد عليك وانت كمان شد حيلك وخلى بالك من نفسك
أحمد عطية
شكرا يا حمادة على إهتمامك والقناة اللى انت بتتكلم عليها عرضوا على الشغل فعلا مش تدريب لكن أنا باتدرب فى القنوات الرسمية مش الخاصة وكمان أنا لسة بادرس عنجليزى فى الجامعة لما اخلصه هابقى أشوف الحياة هتبقى إزاى لان الدنيا اتزحمت على الآخر وشكلها هتطبل على دماغى، ربنا معاك انت كمان
Mariam
عالم التدوين منور بناسه يا قمر
ياسر أبو العلا
اللى يبارك فيك يا فندم معلش المدونة على أد ما قسم ومتزعلش على حكاية الصور دى وربنا يهدى ويستجيب لدعوتك آمين يا رب العالمين
محمد عبد المجيد
طائر الشمال صدقت حينما قلت أن الغربة أهم معلم فى حياة الإنسان ويا رب اتعلم منها الكويس بس ، وشكرا على تعليقك
كراكيب
الله يرحب بيك شرفتنا يا باشمهندز ومتشكرين على التعليق نردوه لك فى مدونتك ان شاء الله
علاء القمحاوى
الله يبارك فيك يا حبيبى بس مش عارفة ليه حسة ان المدونة ضيقة شوية يمكن علشان لسة جديدة ما علينا نورت يا جميل
دماااااااااااغ ماك
مين يومك والله يا بنى محترم وابن ناس والعيبة ما تطلعش من اللى جابك ناقصة أبدا، متشكرين يا عم الحلو على البوست اللى عملته لى عندك فى مدونتك بس قول لأصحابك يحترموا نفسهم شوية فى تعليقاتهم وبجد واحشنى يا واد
الغزالى
لا مؤاخذة يعنى لما انت متعرفنيش ايه اللى دخلك مدونتى من غيرلا إحم ولا دستور ولا انت بتخوفنى بمالك يعنى؟
عموما شرفت يا فندم ومعلش العيال صحابى شحططوك فى مدوناتهم انا تابعت تعليقاتك غى المدونات اللى كتبتت عنى وأهلا بيك صديق دائم للمدونة وللعلم انا فى تورنتو والجو معقول دلوقتى بس ساعات كتير بيستهبل وتلاقى المطر مديها بالعبيط والهوا يطيرك من شدته وبعد ساعة تلاقيها حر جدا والناس مش طايقة هدومهم اللى هم مش لابسينها أساسا لكن فى الغالب الجو رائع
بوشى ونانو
وحشتونى أأأأأأأأأأأأأأأأأأأأأأأأأأأأأأأأأأأأأأأأأأأأأأأأوى يا ولاد ويا رب يا بوشى تاخد بالك من صحتك ومن علاجك وتاكل كويس وما تضربش نانو علشان هى حبيبة قلبى وات كمان حبيبى وسلموا لى على ميار وصافى والعبوا معاهم
الصديق الفاضل اللى طالبنى بحذف الصور
ا لصوردى تذكارية لى ولا تفتقد قواعد ومعايير الإحترام ولم تخل بالآداب العامة أو تخدش الحياء لذا فعفوا لن ألبى طلبك وأحذفها وموضوع الحجاب ده يا جماعة حاجة خاصة جدا أرجو البعد عنه وشكرا على تشريفك وتعليقك
Rana 3amara
معلش انا سافرت بس اللى هيسدوا مكانى كتير وهاسمع كلامك واخلينى قوية أما موضوع البرودة دى اطمنى على الآخر احنا فى بلاد التلج كله يا باشا
هاااااااااااااااى
هاااااااااااااااااااااااااااااى أو hiiiiiiiiiiiiiiiiiiiiiiiii انا مش عارفة انت فرد ولا جماعة بس عموما حلال عليك الايميلات بتاعتى اللى سرقتها
مساء الخيرات
اتفضل شاى

الصديق اللى سأل عنى أنا ووائل وسفرنا فى نفس الفترة باقولك لأ احنا سافرنا عادى جدا وما اتطردناش ولا حاجة ووائل دلوقتى فى مصر وانا مرتبطة بتدريب ودراسة وشكرا لإهتمامك
بحب السيما
عندك حق حب الناس بيخفف أى إحساس بالغربة والوحدة بس طمنينى عملت إيه فى الإمتحانات بتاعتك؟
وليد خربانة يا جدعان
شكرا لإهتمامك ومتابعتك لأخبارى وإن شاء الله هنشر موضوعات مهمة على المدونة أما موضوع هتكت حجابها بنفسها فبجد أنا رافضة الجملة تماما لأن موضوع الحجاب ده حاجة شخصية جدا ويا ريت ما نتكلمش فيه وما تزعلش يا سيدى من اللى بيقولوالى يا بت ولا يا جزمة لأن دول من أعز أصحابى فى مصر ولو دخلت مدوناتهم هتلاقيهم كاتبين عنى والألفاظ دى شائعة بين الأصدقاء ..أقدر لك كثيرا شعورك الطيب ودعواتك لي
شمعى أسعد قصاقيص ورق
الله يبارك فيك وشكرا على تعليقك
آخر تعليق بقى مش عارفة أقولك إيه انت داخل تعلق على المدونة ولا تعلق صاحبتها يا معلم عموما حلوة منك على أد سنك والله أكبر فى عينك

واحد said...

اهنئي أيتها القاهرة ...رحلت عنك عبير وذهبت إلى الجحيم الثلجي في تورنتو في كنكا...
القاهرة لم تفقد بعد أعز ماتملك ..أنا موجود

غريبة said...

الله يحرقك يا أحمد يا ندا ويولع فيك بجاز انت داخل تعلق ولا تدعى على يا واد عموما انت عقابك إن احنا نسيبك للبارانويا دى تقتلك وبعدين ايه حكاية انك اعز ما تملك القاهرة دى معنى كدة انك لا مؤاخذة بتولع مرة واحدة وخلاص زى عود الكبريت ههههههههههه

Anonymous said...

الأخت الفاضلة عبير العسكرى
بعد التحيات والذى منه
سؤال بسيط واقف فى زورى نفسى تجاوبينى عليه
هو انت فى تورنتو البلد ولاكفر تورنتو
هههههههههههههههه
بذمتك موحشتكيش لزوجتى
ترجعيلنا بالف سلامة
طلال فيصل

غريبة said...

مش عارفة أقولك إيه حسبى الله ونعم الوكيل فى اللى قالك على المدونة وعموما واحشنى جدا يا لزج يا ممل وعلشان بحبك يا طلال ما تسكتش على نفسك يا واد الحالة وصلت عندك لدرجة مرعبية لدرجة انك بقيت لزج بيور ربنا معاك ويصبر اللى حواليك

Anonymous said...

إيه ياعبير دول ست أيام ولا ست أسابيع ؟ فينك يابنتى

ياريت تعرفى نواره نجم ان موضوع الحوار عليكو حق مش حيجيب ليها الا وجع الدماغ ومهما حتنفخ مش حيجيلها إلا التهاب اللوزتين
وكفاية مداهنة ليهم وإلا هية رايحه امريكا هى كمان عند بتوع أقباط المهجر وبتظبط الأموووووور أول
قبل ماانسى
الكلام ده فيه منه شويتين للمدون العزيز وائل عباس هوه كمان

vision said...

أنا جيت من عند لسلحافاه تطير...لأقيت الجروب والشله كلها هنا.....سيبك انتى ربنا معاكى وتحققى كل الى نفسك فيه وطبعا دى مش تجربه تخصهم لوحدهم

عجبانى اوى الصور ياريت دايما تحطى صور جديده.....وتعرفينا انتى فين...مش عارفه حباكى من غير ما اعرفك ليه....ما علينا باى باى

غريبة said...

الاستاذ المجهول اللى كاتب التعليق الأول حد قالك إنى حطة سهم وكاتبة عليه مدونة جبهة التهييس الشعبية على بعد كام متر من هنا ولا كاتبة هنا استراحةالوعى المصرى ولاهى سخافةو خلاص وعموماياسيدى حاضر خد بالك يا وائل انت ونوارة ايميلاتكم هتتسرق وهيحطوا السيخ المحمى فى صرصور ودنكم ماشى ياعم الحلو

غريبة said...

camera-girl
أهلا بالحبايب وريحة الحبايب نورتى ياجميلة وعلشان خاطرك هحط صور جديدة وشكراعلى مشاعرك الجميلة

Anonymous said...

مش هتتصلي بي يا استاذة بقى عالموبايل عشان تساليني على مشكلة في اللاب توب !!
انا في انتظار المكالمة من مصر تاني ان شاء الله
و يا رب تكوني بخير اينما كنتي

Anonymous said...

جميلة في كل الأحوال يا عبير.