Monday, May 5, 2008

وحشتوووووووووووونى اوى وبحبكم خالص

نانو الجميلة

ألف حمد الله على سلامتك يا نانو يا جميلة انا كنت حاسة إنك تعبانة وحلمت بيكى يا حبيبتى واتصلت بماما وهى قالت لى انك كويسة لكن قلبى كان واجعنى أووووووووى عليكى يا رب تكونى بخير دلوقت يا حبيبتى يا قلب ماما
وحشتنى أوى كلمة ماما منك ومن بوشى ويارا وصافى وحشتونى أوووووووى يا ولاد
نانو اكتبى لى يا نانو قولى لى عاملة ايه يا قلب ماما أنا قلقانة عليكى أوى وقعدت أعيط كتير بعد ما ماما سحر قالت لى انك كنت تعبانة اوعى تزعلى منى علشان ماتصلتش بيكى وانتى عيانة انا مش كنت عارفة ومحدش قالى حاجة يا نونة واسأليهم وحشتينى ووحشنى حضنك وضحتك وشقاوتك ،خدى بالك من نفسك ومن صحتك يا حبيبتى واسمعى كلام ماما نجاة وماما نعمت وماما سحر وخدى الدوا و اسمعى كلام الدكتور علشان تخفى ولما أجى نسافر انا وانت وبوشى ويارا زى ما اتفقنا،انا كمان هاجيبلك هدية جميلة علشان انتى طلعتى الاولى على المدرسة زى ما وعدتينى.....................بحبك أووووووووووووووووووووووى يا نانو
أمواااااااااااااااااااااااااااااااااااه
بوشى باشا
ابنى البكرى الجميل واحشنى أووووووووووووووووووووووووووووى يا حبيبى ووحشنى حنانك وخوفك على وحبك لى ودفاعك عنى لما بابا وماما كانوا بيتخانقوا معايا علشان السياسة والمظاهرات
وحشنى حضنك وانت نايم جنبى وحاضنى علشان ما اسيبكش وامشى .واحشنى قعدتنا يوم الخميس انا وانت ونانو وأكلنا ولعبنا وفرجنا على الأفلام فى الكمبيوتر بتاعك ،فاكر يا حبيبى كنا بنعمل ايه لما بنتفرج على فيلم رعب كنا بنتغطى تحت البطاطين ونولع النور كله وكنا كل شوية نصرخ من غير ما يحصل حاجة لمجرد اننا بنسمع الموسيقى بتاعة الفيلم..فاكر عيد ميلادك وعيد ميلادى .انا عيد ميلادى بعد كام يوم بس المرة دى هاحتفل بيه لوحدى لكن لما ارجع هنحتفل بيه مع بعض وما تنساش هدية عيد الأم اللى قلت لى انك هتجيبها لى لما أجى ..مش عارفة يا أحمد هاجى امتى واوعى تزعل منى لإنى اتاخرت ومجيتش فى شهر 3 زى ما طلبت منى والله غصب عنى ومش عارفة هاجى امتى لمصر يمكن فى شهر 6 أو فى شهر 7 ادعى لى يا بوشى..مبروك النجاح يا حبيبى انت كمان طلعت الاول على الفصل زى ما وعدتنى وانا هاجيب لك كل حاجة انت عاوزها بس خد بالك من نفسك ومن صحتك انت كمان واسمع كلام ماما نجاة وروح للدكتور وخد العلاج واعمل التحاليل ولو عاوز حاجة ادخل ابعت لى هنا يا بوشى وانا هاكلمك فورا
خدوا بالكم من صحتكم يا ولاد ومن ماما نعمت زى ما وعدتونى مش انتم قلتم لى ما تخافيش احنا هناخد بالنا من ماما نعمت وبابا جدو اسمعوا كلامهم ومتسيبهومش لوحدهم خالص ومتزعلوش حد منهم علشان لما اجى نسافر زى ما اتفقنا ويمكن اجى لكم فى شهر 6 لسة مش عارفة
ميار حبيتى انتى كمان وحشتينى انتى وصافى وجاسر ابعتى لى صورتك يا يارا انت وصافى علشان احطها لك هنا
وحشتونى أووووووووووى أوووووووووووووى وبحبكم خالص وهاموت واشوفكم واخدكم فى حضنى

6 comments:

Sabbagh Online said...

مدونة جميلة جدا

وكلام صادق طالع من القلب

واثر فيا اوى اوى

يارب يطمنك عليهم ويطمنهم عليكى

وما يحرمكو من بعض

تحياتى لكى

احمد

مروة جمعة said...

ربنا يطمنك عليهم يا عبير
ويجمع شملكم على خير يا رب
عسل قوي لمحات الطفولة اللي في التدوينة..

على فكرة بوشي فيه شبه منك
عسل

اتصبحي بالخير
:)

الحاكم بأمره محمود الششتاوي said...

ممكن اطلب ايد نانو

؟؟

أسوور said...

دمعت عيناى والله يا عبير وانا اقرأ رسالتك لصغارك الأعزاء

ولأنى ام .. ولأنى عارفة احساس الأم .. قلبى حس بيكى وعنية ردت عليه بدمعة

ربنا يردك عليهم بالسلامة ويجمعكوا دايما ولا يبعدكوش عن بعض

مافيش اجمل ولا اصدق من مشاعر أم واحشينها ولادها

تحياتى

Turki said...

الله يحفظهم ويحميهم لكي يارب
ويجمعكم على خير


تركي - كندا

Anonymous said...

مدونة جميلة فيها العام والخاص يمتزج فى تناغم سلس. عبير التى هاجمتها الشرطة فى عاصمة المعز وكأنها فصيل إرهابى وشعرت وقتها وشعرنا معها بعميق الإهانة تسافر بعيداً عن حضن الوطن القاسى لتشعر ببعض الأمان المفقود. هناك فى تورنتو شعرت بالأمان لكن لها قلباً معلقاً بالأهل والصحاب والأحباب ويداهمها القلق عليهم كثيراً وتحن لحضنهم والجلوس معهم وتحلم بطيق كشرى وقعدة جميلة مع الرفاق فى البورصة هناك. كل هذا لم ينسيها ألام الوطن المجروح ورفاق خلف القضبان تصرخ مطالبة بحريتهم وفى وسط كل هذا تقول لأطفال من أسرتها وحشتووووووونى وترسل لهم قبلاتها ونحن بدورنا نرسل لها القبلات والتقدير والإحترام والدعاء.
د. أحمد محمد عيد الغبارى