اغفرى لى عجزى وضعفى يا إسراء

إسراااااااااااااااااااااااااااااااء

أسفة مش عارفة اقولك ايه يا جميلة احساسى بالخجل من نفسى ومن ضعفى وعجزى ملجم لسانى ومجمد تفكيرى ، رغم انى ما اعرفكيش معرفة شخصية لكن احساسى بالقلق والخوف عليكى أكبر مما تتخيلى يمكن لأنى عارفة ايه اللى بيعمله الكلاب جوة سلخاناتهم المسماة مباحث أمن الدولة ويمكن لإنك بقيتى قريبة من قلوبنا كلنا ونجحتى فى انك تكونى جوة كل واحد وواحدة فينا كأخت وصديقة نعتز بيها ،كنت باتابع أخبارك أول بأول وكنت قلقانة من إن التجربة دى تكسرك أو تهزك لكن أول ما شفت صورك فى عربية الترحيلات وانتى بتضحكى وبتشيرى بعلامة النصر حسيت أد ايه انتى قوية وأقوى مننا كلنا عارفة يا إسراء ان الصورة دى هزتنى أووووى و حسستينى بإنها خلاص هانت وبجد بكرة قرب ويمكن نشوف شمس الحرية قريب طول ما فيه ناس زيك فى مصر جواهم الأمل والعزيمة والثقة بالنفس والإيمان بقضية بلادهم وحريتها اللى عارفين كويس ان تمن الحرية دى هيكون غالى اووى وان طريقها صعب وطويل

مش هاقولك ربنا يفك اسرك لانك اكثر حرية منا جميعا الآن ومش هاقولك شدى حيلك لإنك اقوى مننا لكن هاقول ربنا يحفظك من الكلاب المسعورة اللى حواليكى ويحميكى من آذاهم وقلوبهم الميتة وضمايرهم المعدومة انا متاكدة إن هما اللى مرعوبين منك ومن كل اخواتنا المعتقلين وأهالينا اللى اتصابوا واللى اتقتلوا بإيد الكلاب

بس فعلا عمر السجن ما غير فكرة وعمره القهر ما أخر بكرة ومهما هيبنوا فى السجون ويعلوا أسوارها مش هيقدروا يمنعوا عن مصر شمس الحرية ولا يمنعوا صوت شعبها الحر اللى جاع واتذل أكتر من ربع قرن

عمر النظام البوليسى ولا سياسة الحديد والنار ما منعت ثورة ولا أجهضت احلام أمة فيها شباب زيك انتى ورفاقك المعتقلين

أرجوكى يا اسراء سامحينى واغفرى لى ضعفى وهوانى على نفسى واحساسى بالمرارة والعجز مش قادرة اعملك اللى تستاهليه ولا قادرة أدافع عنك أدام اللى خطفوكى وحاجزينك عننا

بحبك يا إسراء وأتمنى أننا نكون أصدقاء ونتقابل مع أول زيارة لمصر

يسقط مبارك وسجانيه وسجونه وكلابه المسعورة

وتحيا مصر تحياااااااااااااااااااا مصر